Турли сабабларга кўра кинони тарк этган маҳоратли Голливуд актёрлари

Эътироф этилган истеъдоди, қойилмақом ижроси билан мухлислар қалбидан жой олган қуйидаги актёрлар турли сабабларга кўра киносаноатни тарк этган.

Дэниэл Дей-Льюис

Оскар мукофотининг уч карра лауреати бўлган Дэниэл, актёрлар орасида рекордсмен ҳисобланади. Карьерасини энди бошлаган вақтларидаёқ кинони тарк этишини билдирган актёр, биринчи Оскарни қўлга киритганидан кейин фикридан қайтгандек туюлганди. У атрофдагиларда кинони севганидан эмас, мукофотни қўлга киритиш учунгина актёрлик фаолиятини давом эттирмоқда деган тасаввур уйғотган. Сўнгги марта суратга тушган «Хаёлий ришта» фильмидан кейин эса Льюис ушбу фильм, у учун сўнггиси эканини айтиб, Оскар учун ўзини реклама қилди, деган гап-сўзлар ҳам бўлган. Лекин актёр гапида турган ва дарҳақиқат киносаноатни тарк этган.

Шон Коннери

Тенгсиз актёр деб эътироф этиладиган шотландиялик Шон Коннери, 2003 йилда карьерасига нуқта қўйган. «Таниқли жаноблар лигаси» фильми актёр суратга тушган сўнгги фильм бўлган. Шундан кейин дубляж ва продюссер сифатида ўзини синаб кўрган Коннери, 2011 йилда омма эътиборида бўлишдан чарчагани ва саломатлигида муаммолар борлигини маълум қилган. «Сер Билли» мультфильмига продюсерлик қилган актёр, шундан сўнг рафиқаси билан Багама оролларига жўнаб кетган.

Жек Николсон

Аввалига кинони бутунлай тарк этганини тан олмаган Жек Николсон, 2010 йилдаги «Қандай билиш мумкин ?» фильмидан кейин дарҳақиқат бошқа суратга тушмаган. 2017 йилда бўлса, ҳамкасби ва дўсти Питер Фонда орқали актёрлик фаолиятига нуқта қўйганини маълум қилган. Николсон бу қарорга келишидан аввал, арзийдиган роль ижро қилиш учун яхши сценарий топишга ҳаракат қилган, аммо кўнглидагидек лойиҳа топа олмаган чоғи, кинони қатъий тарк этган. Қойилмақом ижроси билан мухлислар хотирасида қолган собиқ актёр ҳозир 83 ёшда.