COVID-19’нинг асосий клиник аломатлари ва уларнинг кунлик жадвали эълон қилинди

«Юксалиш» умуммиллий ҳаракати COVID-19 касаллигининг асосий клиник аломатлари ҳақидаги Жаҳон соғлиқни сақлаш ташкилоти ҳамда Ўзбекистон Соғлиқни сақлаш вазирлиги тақдим этган маълумотларга асосланган инфографикани эълон қилди.

Йўриқномада касалликнинг кўп ҳолларда учраётган асосий белгилари сифатида қуйидагилар кўрсатилган:

• иситма. Тана ҳароратининг 37,8 даражадан баланд бўлиши. Совуққотиш, қалтираш;
• умумий ҳолсизлик. Танада чарчоқ сезилиши, бош, оёқ ва қўллар зирқираб оғриши;
• қуруқ йўтал. Одатий йўталдан давомийлиги билан фарқланади, бунда тинимсиз йўталиш бир соатдан кўп давом этиши мумкин. Ёки суткада 4-5 марта йўтал кузатилиб, томоқ қизаради;
• нафас қисиши. Кўкрак қафасида оғриқ, нафас олишда қийналиш кузатилади;
• оғриқлар. Бош, бўғим ва мушаклар оғрийди;
• иштаҳанинг йўқолиши. Таомлар истеъмолида иштаҳа йўқолади.

Қўшимча аломатлар сифатида бурун битиши, диарея, ич кетиши, кўнгил айниши, ҳид ва таъм билиш сезгисининг йўқолиши, томоқ оғриғи ҳамда тери, қўл ва бармоқлар рангининг ўзгариши баён қилинган.

Шунингдек, «Юксалиш» умуммиллий ҳаракати томонидан тақдим этилган йўриқномада COVID-19 ҳамда шамоллашнинг бир-биридан фарқли томонларига ҳам тўхталиб ўтилган. Жумладан, шамоллашда бурун оқиши, аксириш, тумов тез-тез кузатилиши, нафас олишда муаммолар бўлмаслиги айтилган.

Коронавирус инфекциясининг енгил кечишининг белгилари сифатида иситмалаш (тана ҳарорати 38 даражагача кўтарилади ёки иситма чиқмаслиги ҳам мумкин), кўп терлаш, лоҳаслик, йўтал, томоқ оғриғи, беҳузурлик, бош оғриғи ва ҳид ва таъм билиш сезгисининг йўқолиши мумкинлиги кўрсатилган.

Иккинчи йўриқномада эса COVID-19’нинг кунлик аломатлари ҳақида маълумот берилган. Коронавирус симптомлари вирус одам организмига тушганидан сўнг маълум бўлиши, инфекциянинг инкубацион даври 14 кун давом этиши таъкидланган.

Хусусан:

• Биринчи ва тўртинчи кунларда. Асосий аломат тана ҳароратининг кўтарилиши, айрим кишиларда мушаклар оғриши, қуруқ йўтал, кўнгил айниши ва ич кетиши кузатилади. Касаллик бошланиши енгил шаклда бўлиши ҳам мумкин, бунда бемор жиддий дорилар қабул қилмайди.
• Бешинчи ва олтинчи кунларда. Айниқса, мавсумий касалликлари бор ёши катталар, қарияларда кузатилади.
• Еттинчи ва саккизинчи кунлари. Нафас олиш янада қийинлашади, бироқ ушбу даврда кучсизланиши мумкин.
• Тўққизинчи ва ўнинчи кунлари. Инфекцияни бошидан оғир кечираётган беморлар жонлантириш бўлимига ўтказилади. Барча аломатларга қорин соҳасида оғриқ қўшилади.
• Ўн иккинчи кун. Беморлар тузала бошлайди, ҳарорат кўтарилиши тўхтайди.
• Ўн еттинчи кун. Соғайганларга жавоб берилади.

Шифокорларнинг таъкидлашича, ушбу касалликда йўтал кенг тарқалган аломатлардан бири бўлгани боис, баъзи беморларда касалхонадан тузалиб чиққандан кейин ҳам йўтал кузатилиши мумкин. COVID-19’дан умумий соғайиш муддати 22 кунни ташкил қилади.

Аввал Ўзбекистонда коронавируснинг аломатсиз шакли билан уйда даволаниш шартлари ишлаб чиқилгани, коронавируснинг аломатсиз шакли билан касалланганларни уй шароитида даволаш тартиби белгилангани ҳақида хабарлар берилган.