Зангиота туманидаги юқумли касалликлар шифохонасида Тошкент шаҳрида яшовчи коронавирусга чалинган 60 ёшли эркак вафот этди. Бу ҳақда Соғлиқни сақлаш вазирлиги хабар қилган.

Хабарда қайд этилишича, Тошкент шаҳрида яшовчи 60 ёшли Б.Э. 2020 йилнинг 6 июль куни эрталаб қон босими юқори бўлиб, гапирмай қўйганлиги сабабли тез тиббий ёрдам машинасида Республика шошилинч тиббий ёрдам илмий марказига олиб борилган.

Унда COVID-19 инфекцияси тасдиқланган ва бемор ўта оғир аҳволда сунъий нафас олдириш аппаратига уланган ҳолда Зангиота туманидаги юқумли касалликлар шифохонасига ўтказилган.

Б.Э.га COVID-19 инфекцияси оғир кечиши ҳамда инсульт ташхиси қўйилган. Хасталик мия шиши, ўткир нафас ва юрак-қон томир етишмовчилиги ҳамда кома асоратлари билан кечган.

Бемор бундан аввал, бир неча йиллардан буён гипертония, қандли диабет билан оғриган, 2019 йилда инсультни ўтказган.

Шифохонада беморнинг даволаниши давомида шифокорлар, жумладан, Соғлиқни сақлаш вазирлиги мутахассислари томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.

Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашган ва у ўткир нафас ва юрак-қон томир етишмовчилигидан вафот этган, дейилади ССВ хабарида.

Тошкентлик 60 ёшли Б.Э. Ўзбекистонда коронавирус инфекцияси асоратлари оқибатида вафот этган 63-бемор бўлди. Аввал Учтепа туманида яшовчи 65 ёшли С.Қ. исмли аёлнинг ўткир нафас ва юрак-қон томир етишмовчилигидан вафот этгани хабар қилинганди.

13 июлда вафот этгани хабар қилинган беморларнинг учови ҳам Зангиотадаги юқумли касалликлар шифохонасига даволанишга ўтказилган кишилар  (Шайхонтоҳур туманида яшовчи 67 ёшли М.Т. исмли аёл, Учтепа туманида яшовчи 65 ёшли С.Қ. исмли аёл ҳамда Тошкент шаҳрида яшовчи 60 ёшли Б.Э. исмли эркак).