NASA ва Япония АҚШнинг Ойни забт этиш борасидаги «Артемида» дастури бўйича ҳамкорликда ишлаш тўғрисидаги келишувни имзолади. Бу ҳақда NASA сайтида маълум қилинган.
Фото: National Geographic
Келишувга кўра, Япониянинг Ой атрофида станция яратишга (Gateway) ва унинг юзасини ўзлаштиришга ҳисса қўшиши кўзда тутилган. Шунингдек, ҳужжат билан АҚШ ва Япониянинг Халқаро космик станция борасидаги мавжуд ҳамкорлигининг узайтирилиши белгиланган.
Маълумотларга кўра, Япония Gateway’га 2019 йилнинг бошида қизиқиш билдирган. Бунга қадар лойиҳага Канада ва Европа космик агентлиги қўшилган эди.
«Роскосмос» эса Ой атрофидаги шлюз модулини яратишда иштирок этишни режалаштирган ва 2017 йилда бу борада музокаралар ҳам ўтказилган эди. Сўнгги хабарларга кўра, Россия давлат корпорацияси ва NASA бирор-бир келишувга эриша олмаган.
NASA 2021 йилда Ойга юк миссияларини юборишни, 2024 йилда эса унинг юзасига астронавтларни чиқаришни режа қилган.
Аввалроқ Lockheed Martin 2030 йил 30 сентябрга қадар Artemis дастури асосида 6 тадан 12 тагача Orion космик кемаларини қуриб битказиши лозимлиги тўғрисида хабар берилган эди.
