Халқаро спорт арбитраж суди (CАS) швейцариялик чавандоз Надя Петер Штайнерни допинг иши бўйича оқлади, дея хабар беради Horse and Hound нашри.
Таъкидланишича, 2017 йилда Штайнернинг тулпорида тақиқланган модда трамадол излари борлиги аниқланган. Кейинчалик Халқаро от спорти федерацияси Штайнерни икки йилга дисквалификация қилиб, (2021 йилнинг май ойига қадар) 7500 Швейцария франки (тахминан, 7,900 АҚШ доллари) миқдоридаги жаримага тортганди.
Чавандоз эса ушбу қарор юзасидан CАS’га шикоят қилган. Унинг сўзларига кўра, унинг жамоасидаги ҳайдовчи бел оғриғига қарши трамадол қабул қилган ва отларни ташишга мўлжалланган юк машинасининг жониворлар сақланадиган жойига бовул қилган (ҳайдовчи буни тасдиқлаган). Штайнернинг оти эса пешоб тушган пичандан еган бўлиши мумкин.
CАS чавандоз нима бўлганини аниқ тушунтириб бергач, отдаги трамадол спортчининг бепарволиги туфайли унинг организмига тушган деган хулосани рад этди. Халқаро от спорти федерацияси ушбу қарорга розилик бериб, Штайнернинг дисквалификацияси ва жаримасини бекор қилди.
Аввалроқ чавандоз мусобақаларнинг бирида тулпори ташкилий қўмита аъзосининг қўлини ялаган вақтда трамадол унинг организмига тушган деб тахмин қилганди. Бироқ бу тахмин етарли даражада ишонарли деб ҳисобланмади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)