Исроил Иордан водийсини аннексия қилишдан (босиб олишдан) бош тортди ва бу ҳақда Фаластин Миллий администрациясини огоҳлантирди, деб хабар беради Times of Israel.
Фото: EPA
Фаластинлик юқори мартабали амалдорнинг сўзларига кўра, тегишли хабар Фаластин президенти Маҳмуд Аббосга Исроилнинг «Моссад» разведкаси бошлиғи Йоси Коэннинг подшоҳ Абдулла II билан учрашувидан сўнг Иордания орқали бериб юборилган.
Исроил томони Фаластин ҳукуматини Иордан дарёсининг ғарбий соҳилидаги икки-учта қишлоқни аннексия қилиш билан чегараланиш ниятида эканлиги тўғрисида огоҳлантирган.
Ўз навбатида АҚШ президентининг катта маслаҳатчиси ва куёви Жаред Кушнер Исроил бош вазири Биньямин Нетаньяхуга мурожаат қилиб, Иордан дарёсининг ғарбий соҳилидаги босиб олинган ҳудудларнинг бир қисмини аннексия қилишни кечиктиришни сўраган.
Араб ОАВнинг ёзишича, Вашингтоннинг бу каби илтимоси Форс кўрфази мамлакатлари билан муносабатларнинг ёмонлашишидан қочишга қаратилган.
Аввалроқ Исроил бош вазири Биньямин Нетаньяху аннексия масаласи юзасидан Исроил Вазирлар Маҳкамасининг биринчи йиғилиши 1 июлда бўлиб ўтишини маълум қилганди.
