Ортиқча вазн инсон ўзини яхши кўрмаслиги учун сабаб бўлмаслиги керак. Лекин семириш ортида организмда жиддий муаммолар бўлиши мумкинлигини ҳам ёдда тутган ҳолда бефарқ бўлмаслик керак.
1. Қалқонсимон без билан боғлиқ муаммо
Гипотериоз вазн ортишининг сабабларидан бири бўлиши мумкин. Агар қалқонсимон бездан етарли миқдорда гормон ажралиб чиқмаса, метаболизм секинлашади ва бу вазн тўплашга олиб келади. Шунингдек, доимий чарчоқни ҳис қилиш, ҳароратнинг ўзгариши кузатилиши мумкин. Маълумотларга қараганда, аёллар гипотериозга эркакларга нисбатан 8 марта кўпроқ чалинади.
2. Кушинг синдроми
Бунда организмдан жуда кўп миқдорда стресс гармони — кортизол ажралиб чиқади. Қорин, елка, бўйин ва юзда ёғ қатламлари кўпайиб, тананинг бошқа қисмлари ўша ҳолича қолиши кузатилади. Кушинг синдромининг келиб чиқиш сабаблари стероидларни қабул қилиши ёки организмдаги ўсмалар билан боғлиқ бўлиши мумкин.
3.Препаратлар
Антидепрессантлар, контрасептик таблеткалар вазн тўплашга сабаб бўлиши мумкин. Шу сабаб уларни истеъмол қилишдан аввал аннотацияси билан танишиш, энг асосийси эса шифокор маслаҳатисиз, ўзбошимчалик билан қабул қилмаслик керак.
4. Поликистоз
Тухумдонлар поликистозида тестостерон миқдори кўпаяди. Бунда бошқа симптомлар сингари вазн ортиши ҳам кузатилади. Ушбу касалликни даволаш учун шифокорга мурожаат қилиш керак, вазн ортиши тўхтамаса парҳез тутиш ва спорт билан шуғулланиш керак бўлади.
5. Депрессия
Депрессиянинг бир қанча симптомлари бор. Улардан энг кўп учрайдигани, тушкун кайфиятда бўлиш ҳисобланади. Шунингдек, энергия етишмаслиги, уйқуда муаммолар бунинг оқибатида эса ичкиликка ружу қўйиш кузатилади. Буларнинг бари эса вазн тўплашга олиб келади. Бундай вазиятда бефарқ бўлмаслик, мутахассисдан тавсиялар олиш ва инсон севган иши билан шуғулланиб кайфиятини кўтариши керак бўлади.
Изоҳ (0)