Инсоннинг ташқи кўриниши, қариш жараёни кўп ҳолларда генга боғлиқ бўлади. Лекин шундай зарарли одатлар борки, ген қандай бўлишидан қатъи назар эрта ажин тушишига олиб келади. Қуйида ушбу одатлар қандай эканига тўхталамиз.
Рациондан ёғни чиқариб ташлаш
Кўпчилик вазн ташлаш учун рационидан ёғни умуман олиб ташлайди ёки ёғсиз парҳез қилишга киришади. Бундай парҳез организмга салбий таъсир қилиш билан бирга, терига ажин тушишига олиб келади. Озиш яхши, лекин организмни қийнаш, саломатликни кетказиш эвазига вазн ташлаш ярамайди. Шунинг учун таомномангизда оз миқдорда бўлса ҳам балиқ маҳсулотлари, ёнғоқ, сметана ва ёғ бўлишига эътибор қаратинг.
Ичимликни «трубочка» да ичиш
Ичимликни «трубочка»да ичиш вақтида лаблар жипслашади ва бу оғиз атрофидаги терига ажин тушишига сабаб бўлади. Шунинг сингари, сигарет чекишда ҳам шу ҳолат кузатилади. Нафақат ёш кўриниш, балки саломатлигингиз учун ҳам чекишни ташлаш тавсия қилинади.
Ёнбошлаб ухлаш
Узоқ умр кўриш уйқунинг тўлиқ ва тиниқ бўлиши билан ҳам боғлиқ. Ёнбошлаб ухлаганда эса юз ёстиққа тегиб туради ва бу вақтда тери нафас олмайди, қон яхши айланмайди. Бу эса ўз навбатида юз териси ва бўйинга эрта ажин тушишига олиб келади. Терининг ёш ва гўзаллигини сақлаш учун тўғри, тепага қараб ётиш энг яхши вариант ҳисобланади.
Қоматни тик тутмаслик
Букчайиш ва ўтирганда қоматни тик тутмаслик умуртқанинг эгилиши ва қийшайишига сабаб бўлиши мумкин. Бу вақтда мускуллар зўриқади ва шунинг учун ҳам биз чарчоқ ва оғриқни ҳис қиламиз. Бундан ташқари, тик юриш қоматга ва ҳаёт тарзига ҳам таъсир қилмай қолмаслигини ёддан чиқармаслик керак.
Қуёш нуридан сақланмаслик
Ультрабинафша нурлари — эрта қаришга олиб келувчи энг асосий сабаблардан бири ҳисобланади. Шунга қарамасдан, кўпчилик фақат ёзги дам олиш вақтларигина қуёш нурларидан сақланиб, кундалик турмушда ҳимояланишга риоя қилмайди. Аслида эса ҳафта давомида иш ёки ўқишга қатнаш учун кўчага чиқилганда қуёшдан зарарланиш эҳтимоли юқори бўлади, Шуни инобатга олган ҳолда, ҳимояловчи воситалар, таркибида SPF бўлган кремлардан фойдаланиш тавсия қилинади. Булутлар 80 % ультрабинафша нурларини ўтказгани учун жазирама бўлмаган кунларда ҳам бундай кремларни суртишни канда қилмаслик керак.
Изоҳ (0)