Фарғонада ўн беш кунда 1016 та оилада 30 кишилик тўй ўтказилди, деб хабар бермоқда ЎзА.
Қайд этилишича, ўтган 5 ой давомида вилоятда 7300 дан ортиқ жуфт ёш расмий никоҳдан ўтиш учун ариза берган. Буларнинг 5779 тасига никоҳ тузилганлиги ҳақидаги гувоҳномалар тантанали топширилган. 1 июнидан 12 июнига қадар фарғоналик 1016 жуфт ёш 30 кишилик тўй ўтказиш учун рози бўлиб ФҲДЁ бўлимларига мурожаат қилган.
Карантин сабаб ўтган йилга нисбатан никоҳланувчилар сони пасайди. Лекин махсус комиссиянинг ихчам тўйлар ўтказиш юзасидан берган топшириғи ортидан Олтиариқ туманида 93 та, Тошлоқ туманида 57 та, Қўқон, Фарғона ва Марғилон шаҳарларида эса жами 313 та никоҳ ФҲДЁ бўлимлари томонидан қайд этилди.
«Аслида камхарж ва ихчам тўйлар мамлакатимизда одатга айланиши зарур. Чунки минглаб фуқароларимиз, оила боқувчилари чеки йўқ орзу ҳаваслар ортидан чет элларга ишлаш учун кетиши ҳам рост. Бир кунлик тўй учун йиллар давомида йиғинамиз. Бизнингча, пандемия шароити баҳонасида ана шундай ортиқча харажатлар ва оворагарчиликлардан воз кечиш фурсати етди», — дейди Раъно Бойқўзиева, ДХА Фарғона вилоят бошқармаси бошлиғи.
Мавзуга доир:
Эслатиб ўтамиз, Ўзбекистонда коронавирус инфекцияси тарқалишининг олдини олиш мақсадида 23 мартдан бошлаб тўй-маросимларнинг ўтказилиши бекор қилинган эди. Республика махсус комиссиясининг 30 майдаги қарори билан 1 июндан бошлаб «яшил» ҳудудларга оилавий тантана, тўй, маърака ва маросимларни ўтказишга рухсат берилди.
Изоҳ (0)