Ўзбекистонда 12 июнь куни коронавирус қайд этилган 128 нафар бемордан 26 нафари аҳоли орасида аниқланган. Соғлиқни сақлаш вазирлиги хабарига кўра, уларнинг 14 нафари Тошкент шаҳрида, Бухоро ва Тошкент вилоятларида 5 нафардан, Самарқанд вилоятида эса 2 нафар фуқарода қайд этилган.
Фото: «Дарё»
Жумладан, Бухоро вилоятининг Шофиркон, Жондор ва Вобкент туманларида яшовчи фуқароларда ҳамда Самарқанд вилояти Ургут туманида яшовчи 2 нафар фуқарода ҳам коронавирус инфекцияси тасдиқлангани ҳақида аввал хабар берилганди.
Бундан ташқари, Тошкент шаҳри қурилиш объекти ишчисида ва қурилиш объектига ишга кириш учун таҳлил топширган фуқарода, Юнусобод туманида яшовчи фуқарода (тана ҳарорати кўтарилган, уй шароитида даволанган, сўнгра шифхонага бориб таҳлил топширган), ушбу туманда яшовчи яна бир фуқаро (тана ҳарорати кўтарилаётганлиги сабабли таҳлил топширган), Зангиота туманида яшовчи фуқарода (санаторийда ётиш учун таҳлил топширган) коронавирус аниқланган. Айни пайтда ушбу ҳолатлар юзасидан эпидемиологик суриштирув ишлари олиб борилмоқда.
Мавзуга доир: Тошкентда 7 июнь куни коронавирус аниқланган 195 беморнинг 183 нафари битта компанияда ишлаётган қурувчилар бўлган (видео)
«Хориждан келган фуқароларимиз карантинга олингани боис, улардан касалликнинг тарқалиш хавфи паст», — дейилади вазирлик хабарида.
Ўзбекистонда касалликни қаердан юқтириб олганини билмасдан юрганлардан касаллик тарқалиш хавфи ўта юқори эканлиги сабабли Соғлиқни сақлаш вазирлиги аҳолини карантин ва санитария талабларига тўлиқ риоя этишга, заруратсиз кўчага чиқмасликка, ижтимоий масофа сақлаш, қўлларни яхшилаб қайта-қайта ювиш, кўчага чиққанда ниқоб тақиш каби қоидаларга қатъий риоя этишга чақирди.
Маълумот учун, 13 июнь соат 17:00 ҳолатига кўра, коронавирус инфекциясига чалинганлар сони 36 нафарга кўпайиб, 4937 нафарга етди. Касалликдан соғайганлар сони 3837 кишини ташкил этмоқда, вирус асоратларидан 19 киши вафот этган.
