Наманганда лицей ўқитувчиси университетга ўқишга киритиб қўйишни ваъда қилиб, 2,5 минг АҚШ доллари ва 5 миллион сўм миқдорида пул талаб қилган ва уларни олаётган вақтида қўлга тушган. Бу ҳақда Бош прокуратура матбуот хизмати «Дарё»га маълум қилди.

Бош прокуратура ҳузуридаги департаментнинг Наманган вилоят бошқармаси томонидан ўтказилган тезкор тадбирда Наманган Давлат университети қошидаги академик лицей ўқитувчиси Р.Қ. қўлга олинди. Р.Қ. А.К.нинг ишончига кириб, унинг ўғлини юқори лавозимда ишловчи танишлари орқали НамДУга ўқишга киритиб қўйишни ваъда қилиб, 2,5 минг АҚШ доллари ва 5 миллион сўмни фирибгарлик йўли билан олган вақтида ашёвий далил билан ушланган.

Мазкур ҳолат юзасидан Р.Қ.га нисбатан Жиноят кодексининг 168-моддаси 2-қисми (Фирибгарлик) ва 211-моддаси (Пора бериш) билан жиноят иши қўзғатилиб, тергов ҳаракатлари олиб борилмоқда.

Аввал Термизда 10 миллион сўмга сохта диплом расмийлаштириб бермоқчи бўлган коллеж директори ўринбосари ДХХ томонидан қўлга тушгани, Сирдарёда фуқарони қалбаки маълумотлар ёрдамида ўқишга киритиб қўймоқчи бўлган шахслар ушлангани ва 5 минг доллар эвазига консерваторияга ўқишга киритиб қўйишни ваъда қилган лицей ўқитувчиси қўлга олингани ҳақида хабарлар берилган. 2020 йил март ойида Тошкентда ишга киритиб қўйиш учун фуқаролардан қарийб 19 миллион сўм ундираётган «майор» ҳибсга олинган.