Олмазор туманидаги корхоналар фаолияти, янги бинолар ва лойиҳалар билан танишган Шавкат Мирзиёев мутасадди раҳбарлар иштирокида туман фаоллари, нуронийлар билан туманда камбағалликни қисқартириш, инвестиция лойиҳаларини амалга ошириб, янги иш ўринлари ташкил этиш, аҳолининг турмуш шароитларини яхшилаш масалалари муҳокамасига бағишланган йиғилиш ўтказди. Бу ҳақда Президент матбуот хизмати хабар қилган.
Учрашувда 2020 йилда қиймати 3 триллион сўм бўлган 48 та инвестиция лойиҳаси ишга туширилиши режалаштирилгани қайд этилган. Бош вазир ўринбосари тўлиқ ишлатилмаётган 12 та давлат объекти ва илгари хусусийлаштирилиб, ҳозир бўш турган 97 та бино ва ер майдонлари негизида янги корхоналарни ташкил этиш бўйича лойиҳа таклифларини тақдимот қилган.
Шавкат Мирзиёев янги лойиҳалар учун имкониятларни кенгайтириш мақсадида Тошкент туманининг Олмазорга яқин ҳудудидан 200 гектар ер ажратиб, янги саноат зонаси барпо этишни таклиф қилди ва у ерда ташкил этиладиган корхоналарда камида 60 мингта янги иш ўрни яратиш мумкинлигини таъкидлади.