Ўзбекистонда 15 июндан бошлаб «яшил» ва «сариқ» ҳудудларда буюм бозорлари фаолиятига рухсат берилди. Шу сабабли кўпчиликни карантин даврида буюм бозорлари фаолиятига рухсат берилиши хавфли эмасми, деган савол қизиқтирмоқда. Бу саволга Соғлиқни сақлаш вазирлиги Санитария-эпидемиологик осойишталик агентлиги директорининг биринчи ўринбосари Ботир Қурбонов 12 июнь куни АОКАда бўлиб ўтган брифингда жавоб берди.

Фото: «Дарё»

«Буюм бозорларида эпидемиологик барқарорликни таъминлаш ва касаллик кенг тарқалишининг олдини олиш учун барча зарурий профилактик чоралар кўрилади. Жумладан, буюм бозорлари ҳар куни иш бошлашидан олдин ва иш вақти тугаганидан сўнг дезинфекция қилиниши, уларнинг кириш-чиқиш жойларини пирометрлар, антисептик воситалар ва дезинфекцион ‘тўшак’лар билан жиҳозланиши асосий талаблардан биридир», — дейди Ботир Қурбонов.

Шунингдек, унинг таъкидлашича, буюм бозорларининг ҳар бирида алоҳида-алоҳида дўконларнинг бўлиши ва уларда оралиқ масофани, яъни сотувчи ва харидор ўртасида масофани сақлаган ҳолда савдо қилиниши, бу жараёнда ҳамма тиббий ниқоб ва қўлқопларда бўлиши, қўлларини тез-тез зарарсизлантириб туриши талаб этилади.

Шу билан бирга масъуллар дўконга киришдан олдин ҳар бир фуқаронинг тана ҳароратини ўлчаб, тана ҳарорати 37 даража ва ундан юқори бўлган, инфекция аломатлари мавжуд бўлган ҳамда тиббий ниқобсиз юрган шахсларни буюм бозорлари ҳудудига киритмаслик (ушбу фуқароларни алоҳидалаш ва 103 рақами орқали тез тиббий ёрдамга мурожаат этиш) чораларини кўришлари лозим.

«Кичик дўконларга бир нечта харидорнинг зич бўлиб кириб олишига йўл қўйилмаслиги керак. Бунда ҳар бир дўконнинг майдонидан келиб чиққан ҳолда 2 метрлик ижтимоий масофани сақлаган ҳолда харидорлар киритилиши, меъёрдан ортиқлари ташқарида оралиқ масофани сақлаган ҳолда кутиб туришлари талаб этилади», — деди Ботир Қурбонов.

Шунингдек, республиканинг қайси рангли ҳудудларида бўлишидан қатъи назар, фуқароларни ниқобда юришга, карантин ва санитария қоидаларига амал қилишга чақирди.

Эслатиб ўтамиз, Соғлиқни сақлаш вазирлиги 23 май куни бозорлар ходимларини оммавий тестдан ўтказиш жараёнида Тошкентдаги «Ўрикзор» бозоридаги сотувчиларнинг бирида коронавирус аниқланиб, бозор вақтинчалик ёпилганди, 30 май куни сотувчининг ўғли ва қизида ҳам коронавирус инфекцияси аниқланганди. 1 июнь куни эса «Ўрикзор»даги яна бир сотувчида ва Юнусободдаги дўкон сотувчисида коронавирус аниқланди.