2020 йил 1 июнь ҳолатига кўра, Ookla компанияси «Speedtest.net» сервиси COVID-19’нинг интернет глобал суръатига таъсирини эълон қилди. Бунинг натижаларга кўра, Ўзбекистонда интернет тезлиги 6 фоизга (Fixed Speed Change), мобил интернет тезлиги эса 18 фоизга (Mobile Speed Change) кўтарилган. Бу ҳақда Ахборот технологиялари ва коммуникацияларини ривожлантириш вазирлиги ахборот хизмати хабар берди.

Фото: Ахборот технологиялари ва коммуникацияларини ривожлантириш вазирлиги

ахборот хизмати

Жаҳон миқёсида COVID-19 пандемияси шароитида интернетнинг ўртача тезлиги 1 фоизга (Fixed Speed Change), мобил интернет тезлиги 7 фоизга ўсган, холос (Mobile Speed Change).

Ўзбекистонда эса интернет тезлиги 6 фоизга (Fixed Speed Change), мобил интернет тезлиги эса 18 фоизга (Mobile Speed Change) кўтарилган.

«Таъкидлаш керакки, охирги йилда интернет тезлиги бўйича ижобий ўзгаришлар амалга оширилди. Жумладан, 2020 йил апрель ҳолатига кўра, интернет тезлиги бўйича рейтингда Ўзбекистон 94-поғонани эгаллаган. Яъни бир йил давомида 37 поғонага кўтарилиб, 131-ўриндан 94-поғонага юқорилаган. Ўзбекистонда охирги йил натижаларига кўра, интернет тезлиги қарийб 2,3 бараварга ўсган. 2019 йил март  ҳолатига кўра, 11,62 Мбит/с бўлган бўлса, 2020 йил апрель ҳолатига кўра, 25,88 Мбит/секунд гача кўтарилди. 2020 йил 1 июнь ҳолатига кўра эса Ўзбекистонда  интернет тезлиги 27,12 Мбит/секундни ташкил этди.

Бундан ташқари охирги ой натижаларига кўра, мобил интернет тезлиги ҳам ўсмоқда: биргина 2020 йил апрель ҳолати бўйича мобил интернет тезлиги 9,68 Мбит/секундни ташкил қилган бўлса, бир ой ичида мазкур кўрсаткич 11,92 Мбит/секундгача ўсди», — дейилади хабарда.