Испания Ла Лигасида янги мавсум қачон бошланиши маълум бўлди
Испания Ла Лигаси президенти Хавьер Тебас Примера баҳлари қачондан давом эттирилиши ва келаси мавсумнинг бошланиш саналарига аниқлик киритди.
«Насиб қилса, мавсумни 11 июндан давом эттирамиз. Ла Лиганинг 130 ходими ташкилотчилик устида ишламоқда, ҳаммаси ўзгача бўлади. Биз тайёрмиз ва бизнинг асосий мақсад — мавсумни якунлаб қўйиш. Келаси мавсум 12 сентябрдан старт олади», — дейди Тебас.
Эслатиб ўтамиз, Испания чемпионати коронавирус пандемияси сабаб март ойида тўхтаб қолганди. Аввалроқ испан клублари гуруҳ машғулотларини бошлаганди. 27-турга келиб «Барселона» 58 очко тўплаган ҳолда пешқадам бўлиб турибди. Ундан икки очко кам жамғарган «Реал» эса иккинчи ўринни банд этган.
Маълумот учун, одатда Испанияда янги мавсум август ойининг дастлабки ярмида бошланади. Бироқ жорий мавсумнинг чўзилиши боис 2020/21 йилги мавсум бироз кеч бошланади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
