Pakistan International Airlines лайнерининг Карачи яқинида кутилмаганда қулаб тушишига самолётнинг қушлар галаси билан тўқнашиб кетгани сабаб бўлиши мумкин. Бу ҳақда маҳаллий Nation газетасининг Twitter’ида маълум қилинган.
Фото: EPA
Нашр ҳукумат вакиллари авиаҳалокат ҳақида берган биринчи ҳисоботга таянган. Газетада ёзилишича, самолётнинг шасси ғилдиракларида ҳам муаммо кузатилган.
Аввал Reuters’нинг Покистон фуқаролик авиациясидаги манбаси ҳам шасси билан боғлиқ муаммо ҳақида маълум қилганди. Агентлик суҳбат қилган ходимнинг сўзларига кўра, самолёт техник муаммо сабаб қўниш олдидан шассини ишга тушира олмаган.
Pakistan International Airlines бош директори Аршад Малик матбуот анжуманида самолётнинг техник жиҳатдан соз ҳолатда парвозни амалга оширганлигини билдирган. У авиаҳалокат сабаблари бортдаги махсус қурилма ҳамда қора қути маълумотлари асосида аниқланишини қайд этган.
«Қора қути топилмагунича бу борада аниқ бир фикр айтиб бўлмайди», – дея авиакомпания раҳбари сўзларини келтирган Gео ТV.
Аввал Pakistan International Airlines авиакомпаниясига тегишли Airbus А320 йўловчи самолёти Карачи шаҳри аэропорти яқинида қўнишга бир дақиқа қолганда ерга қулагани, лайнер аҳоли яшайдиган ҳудуд устига тушгани, самолёт бортида аввалига 107 киши бўлгани ёзилган, кейинчалик уларнинг сони 98 нафар экани, ҳаво кемаси йўловчиларининг 2 нафари омон қолгани хабар қилинган.
