«Тоттенҳэм» бош мураббийи Жозе Моуриньо Чемпионлар лигаси 2009/10 йилги мавсум ярим финал жавоб баҳси доирасидаги ўйинда «Манчестер Сити» устози Хосеп Гвардиолага нималар деганини айтди.

Фото: Getty Images

Дастлабки баҳсда Моуриньо қўл остидаги «Интер» Гвардиоланинг «Барселона»сини 3:1 ҳисобида мағлуб этади. Иккинчи ўйин эса «кўк-анорранглилар»нинг 1:0 ҳисобидаги ғалабаси билан якун топади.

Иккинчи бўлим ўрталаридаги баҳсли вазиятда миланликлар ярим ҳимоячиси Тиаго Мотта каталонлар етакчиси Серхио Бускетсга нисбатан ишлатган қўполлиги сабаб майдондан четлатилади.

«Бускетс ҳушидан кетаёзган вақтда мен Мотта четалатилган жой ва захира ўриндиқлари ўртасида тургандим. Четлатишдан сўнг «Барселона» захира ўриндиғидагилар ғалаба қозонгандек хурсанд бўлаётганига кўзим тушди.

Шу вақтда Гвардиола 11 га 10 тактикаси ҳақида гаплашиш учун Златан Ибрагимовични чақирди. Мен унга қарата шундай дедим: «Базмни бошлаб юборма, ўйин ҳали тугамади».

Ўз вақтида қарор чиқаришни билиш керак. Бу ҳаётимдаги энг ажойиб ғалабалардан бири бўлган. Биз 0:1 ҳисобида ютқазмагандик, биз жуда қалтис вазиятда 3:2 га ютганмиз», — дейди Моуриньо.

Икки ўйин натижасига кўра финалга йўл олган «Интер» ҳал қилувчи баҳсда «Бавария»ни 2:0 ҳисобида мағлуб этган ҳолда бош совринга эга чиқади. Ўша мавсум миланликлар А Серия ва Италия Кубогида ҳам зафар кучган ҳолда требл қайд этганди.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!