Бутун дунё бўйлаб янги турдаги COVID-19 коронавирус инфекцияси билан касалланганлар сони 5 миллион кишидан ошиб кетди. Бу ҳақда касаллик тарқалишини реал вақтда кузатаётган Жонс Ҳопкинс университети маълумотларида келтирилган.
Фото: Reuters
Касалларнинг аксарияти — 1,5 миллиондан ортиғи АҚШ ҳисобига тўғри келмоқда. Иккинчи ўринда эса 308 минг бемор билан Россия жойлашган. Учинчи ўринни 290 мингдан ортиқ бемор билан Бразилия эгаллаб турибди.
Ҳозирга қадар дунё бўйлаб коронавирус оқибатида вафот этганлар сони 328 минг кишидан ошди. COVID-19 қурбонларининг 93 мингдан ортиғи АҚШ ҳисобига тўғри келмоқда. Ўлим ҳолати бўйича иккинчи ва учинчи ўринни мос равишда Буюк Британия (35 мингдан ортиқ) ва Италия (32 мингдан ортиқ) эгаллаган.
Коронавирус инфекциясига чалинган қарийб 1,9 миллион киши даволанишга муваффақ бўлган.
Россияда бугунги кунга қадар коронавирус оқибатида 3 мингдан ортиқ одам вафот этди, 85 мингдан ортиқ бемор соғайди.
Ўзбекистонда 21 май соат 10:00 ҳолатига кўра коронавирус инфекцияси қайд этилганлар сони 2950 нафарни ташкил қилмоқда. Мамлакатда 2372 нафар коронавирус инфекциясига чалинган фуқаролар бутунлай соғайди, ҳозирда 565 нафар бемор даволанмоқда.
Аввалроқ ЖССТ дунёда коронавирус пандемиясининг иккинчи тўлқини бошланишидан огоҳлантирган эди.
Мавзуга доир:
Эслатиб ўтамиз, 20 май ҳолатига кўра, бир сутка ичида бутун дунёда коронавирус юқтириб олиш бўйича 106 мингта ҳолат қайд этилиб, касалланишлар сони бўйича антирекорд янгиланган эди.
