Бухоро туманидаги мактабгача таълим ташкилоти раҳбари тарбиячи вазифасига ишга қабул қилиш эвазига фуқародан 300 доллар пора сўради. Бу ҳақда «Дарё»га Жиноят ишлари бўйича Бухоро туман суди раиси Нозимжон Жўраев маълум қилди.
Аниқланишича, 2019 йилнинг ноябрь ойида фуқаро Мастура Туропова (барча исм-фамилиялар ўзгартирилган) тумандаги 4-сонли мактабгача таълим ташкилоти раҳбаридан иш сўраб мурожаат қилган. Боғча мудираси Мадина Жўраева қулай фурсатни бой бермай, ёрдамчи тарбиячи бўлиб ишлаётган Мавлуда Ражабова билан келишиб, фуқарога ишга кириш учун 300 доллар бериши лозимлигини уқтиради.
Мавлуда Ражабова орқали ишга кириш «ставка»сини эшитган Мастура Туропова эртасига 300 доллар эмас, 300 минг сўм олиб келади. Ёрдамчи тарбиячи эса боғча мудираси бунга кўнмаслигини, акс ҳолда бошқа кишини ишга қабул қилиши мумкинлигини айтиб, келишилган пулни тўлиқ берганидан сўнггина ишни бошлашини билдиради. Мастура Туропова наилож рози бўлиб, ташкилот биносидан чиқиб кетади ва ҳолат бўйича Иқтисодий жиноятларга қарши курашиш департаментнинг Бухоро туман бўлимига мурожаат қилади.
Шу куни орадан тўрт-беш соат ўтгач, Мастура Туропова махсус ишлов берилган 300 доллар пулни боғчага олиб боради. Ва ёрдамчи тарбиячига беради. Тарбиячи эса пулни олиб, хона марказидаги стол остидаги тортмага жойлаштиради ва Мастура Туроповага ишни бошлаши мумкинлигини айтади.
Ҳуқуқ-тартибот ходимлари эса тадбирни давом эттириб, боғча мудирасини пора устида қўлга олган.
Жиноят ишлари бўйича Бухоро туман суди боғча мудирасини Жиноят кодексининг 210-моддаси 2-қисмининг «в» банди (Пора олиш) билан айбли деб топиб, уни икки йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиб, тўрт йилга озодликни чеклаш ҳақида ҳукм чиқарди.
Изоҳ (0)