2021 йилдан бошлаб давлат ветеринария хизмати назорати остидаги маҳсулотларни Ўзбекистонга олиб кириш тартиби қатъий назорат қилинади. Бу Вазирлар Маҳкамасининг 2020 йил 11 майдаги «Давлат ветеринария хизмати назорати остидаги товарлар хавфсизлигини таъминлаш бўйича қўшимча чора-тадбирлар тўғрисида»ги қарорда белгилаб қўйилган, деб ёзмоқда Norma.
Қарорга кўра, 2021 йил 1 январдан бошлаб Давлат ветеринария хизмати назорати остидаги товарларни олиб киришга экспорт қилувчи ташкилотлар ва шахслар реестрига киритилган хорижий экспорт қилувчиларга рухсат берилади.
Мазкур товарларни олиб киришга рухсатнома олиш учун базавий ҳисоблаш миқдорининг 1 баравари миқдорида йиғим белгиланди.
Белгиланишича, ушбу тартиб фавқулодда вазиятларда, халқаро кўргазмаларда қатнашишда, лаборатория таҳлиллари учун намуналарда, шунингдек, дипломатик корпус, илмий ва давлат мақсадлари учун олиб келинадиган товарларга нисбатан татбиқ этилмайди.
Қарорда қайд этилишича, мазкур тартиб мамлакат ҳудудига ўта хавфли юқумли касалликларни қўзғатувчилар кириб келишининг олдини олиш ҳамда тарқалиши хавфини бартараф этишда хавфсиз муҳофазанинг самарали тизимини яратиш, шунингдек, давлат ветеринария хизмати назорати остидаги товарларни олиб кириш тартиб-таомилларини янада соддалаштириш ва такомиллаштириш мақсадида жорий қилинмоқда.
Ветеринария ва чорвачиликни ривожлантириш давлат қўмитасига уч ой муддатда Реестрни шакллантириш ва юритиш тартиби тўғрисидаги низомни ишлаб чиқиш ва тасдиқлаш топширилган.
«Ветеринария тўғрисида»ги қонунга кўра, давлат санитария назорати остидаги маҳсулотларга ҳайвонлар, келиб чиқиши ҳайвонларга мансуб маҳсулотлар ва хом ашёлар, ветеринария дори воситалари, микроорганизмлар штаммалари, ҳайвон озуқаси ва озуқа қўшимчалари, ветеринария техник воситалари, шунингдек, бозорларда сотиладиган ўсимлик озуқа маҳсулотлари киради.
Изоҳ (0)