Тошкент шаҳрида 23 нафар бемор COVID-19’дан тузалди. Ўзбекистонда коронавирусдан соғайганлар сони 1364 нафарга етди
Вирусология илмий-текшириш институти клиникасидан 9 нафар, Эпидемиология, микробиология ва юқумли касалликлар илмий-текшириш институти клиникасидан 8 нафар, Тошкент тиббиёт академияси кўп тармоқли клиникасидан 6 нафар коронавирус инфекциясига чалинган беморлар касалликдан бутунлай соғайди. Бу ҳақда Соғлиқни сақлаш вазирлиги хабар берган.
Улар Республика ихтисослаштирилган терапия ва тиббий реабилитация илмий-амалий тиббиёт марказига кузатилган.
Вирусология илмий-текшириш институти клиникасидан соғайганларнинг 7 нафари Тошкент шаҳридан, 2 нафари эса мос равишда Бухоро ва Тошкент вилоятларида истиқомат қилади. Улардан 8 нафари коронавирус инфекциясига чалинганлар билан мулоқот орқали касалликни юқтириб олган. Бир нафар фуқаро эса Россиядан келганидан кейин карантинга олинган. Коронавирус аниқлангач, клиникага ётқизилган. Беморларнинг 6 нафари эркак, 3 нафари аёл. Улар орасида энг ёши каттаси 61 да бўлса, энг кичиги 9 ёшда.
Эпидемиология, микробиология ва юқумли касалликлар илмий-текшириш институти клиникасида тузалган 6 нафар бемор коронавирус инфекциясига чалинганлар билан мулоқот орқали касалликни юқтирган. Икки киши Россиядан келгач, карантинга олинган ва COVID-19 аниқлангач, клиникага ётқизилган. Берморларнинг 3 нафари Тошкент шаҳрида, яна 3 нафари Тошкент вилоятида яшовчи фуқаролар, қолган икки бемор мос равишда Қорақалпоғистон Республикаси ва Жиззах вилоятидан. Беморлардан 6 нафари эркак, 2 нафари аёл. Энг ёши каттаси 58 да, энг кичиги эса 10 ёшда.
Тошкент тиббиёт академияси кўп тармоқли клиникасида соғайганларнинг 3 нафари Тошкент шаҳридан, 3 нафари мос равишда Сирдарё, Наманган ва Тошкент вилоятларидан. Уларнинг 1 нафари Қозоғистон орқали Россиядан, яна 1 нафари Қозоғистондан, 1 нафари эса Туркиядан Ўзбекистонга келган ва карантинга олинган. Касаллик аниқлангач, мазкур клиникага ётқизилган. Қолган 3 бемор эса коронавирус инфекциясига чалинганлар билан мулоқотда бўлиб, касалликни юқтириб олган.
Тузалганларнинг 5 нафари эркак, 1 нафари аёл, энг ёши каттаси 62 да, энг кичиги 19 ёшда.
Тошкент шаҳрида шу пайтга қадар 432 нафар бемор соғайган бўлса, эндиликда уларнинг сони 455 нафарга етди, дейилади хабарда.
Ўзбекистонда 2020 йил 4 май соат 15:30 ҳолатига кўра, бир сутка ичида 51 нафар бемор коронавирус инфекциясидан фориғ бўлди ва тузалганлар сони 1370 нафарга етди.
Ўзбекистонда 4 май соат 15:00 ҳолатига кўра, коронавирус инфекциясини юқтириб олганлар сони 21 кишига кўпайиб, 2181 нафарга етган, аввалроқ 4 май соат 10:00 ҳолатига кўра, коронавирус инфекциясини юқтириб олганлар сони 2160 нафарни ташкил этгани маълум қилинган эди.
Ўзбекистонда 15 мартдан буён коронавирусга чалинган беморларнинг ўн нафари вафот этди.
Ўзбекистонда коронавирусдан холи ҳудудлар сони учтага етган — Жиззах вилоятида уч бемор, Қашқадарёдаги олти бемор ва Навоий вилоятида икки нафар бемор соғайиб кетганди.
