Ахборот технологиялари ва коммуникацияларни ривожлантириш вазирлиги Сирдарё вилояти Сардоба сув омборидан сув чиқишининг эҳтимолий салбий оқибатларидан бири телекоммуникация тармоқларининг шикастланиши каби ҳолатларнинг олдини олиш мақсадида бир қатор телекоммуникация объектлари, хусусан, хавфли ҳудудлардаги телефон станциялари ва мобил алоқа база станциялари ишлаши назоратга олинганини хабар қилди.
Сирдарё вилоятидаги сув остида қолган ҳудудлар.
Фото: ФВВ
Вазирлик томонидан телекоммуникация тармоқларида эҳтимолий келиб чиқиши мумкин бўлган салбий оқибатларни қисқа муддатларда бартараф этишни ташкил этиш ҳамда барқарор алоқа хизматлари кўрсатилишини қайта тиклаш учун соҳа корхоналари ҳамда мобил алоқа операторларининг захира кучлари шу ҳудудга сафарбар қилинган.
Шу билан бир бирга аҳоли эвакуация қилинган ҳудудларда ташкил этилган мувофиқлаштириш марказларини зарур алоқа тармоқлари билан таъминлаш чоралари кўрилмоқда.
Ушбу ҳудудларда фойдаланувчиларга телекоммуникация хизматларининг кўрсатилишида тўхталишлар ва узилишлар кузатилиши мумкин, дейилади хабарда.
1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келган. Натижада Сардоба тумани Қўрғонтепа аҳоли яшаш пунктига сув кирган. Бунда, асосан, сув экин майдонларига зарар етказганлиги маълум бўлди.
Воқеа жойига дастлаб бош вазир Абдулла Арипов, сўнгра давлат раҳбари Шавкат Мирзиёев етиб боргани хабар берилди.
Мавзуга доир: Фото: Президент Шавкат Мирзиёев Сардоба туманида
Кейинчалик Сирдарёнинг сув остида қолган маҳаллалари аҳолиси Жиззахдаги мактаб ва коллежларга жойлаштирилаётгани, ФВВ Сардоба сув омборидан сув чиқиши камайганини хабар қилган, кейинроқ сув чиқиши тўхтатилгани ҳақида маълум қилинган.
