АҚШ КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганмоқда. Таъкидланишича, Ким Чен Ин жиддий хавф остида бўлиши мумкин. Бу ҳақда CNN телеканали исмини ошкор қилмаган америкалик амалдорга таяниб, хабар берди.

Фото: NKphoto

Телеканалнинг бошқа манбалари ҳам Шимолий Корея етакчисининг соғлиғи ёмонлашгани тўғрисидаги маълумотларни тасдиқлаган, бироқ Ким Чен Иннинг соғлиғи қанчалик хавф остида эканлигини баҳолаш имконсиз. Америка ҳукумати ушбу ҳолатга расман изоҳ бермаган.

Yonhap агентлигининг маълум қилишича, Жанубий Кореяда Ким Чен Иннинг соғлиғи ёмонлашгани тўғрисида маълумот йўқ.

Daily NK’нинг ёзишича, Ким Чен Инда 12 апрель куни юрак-қон томир тизимига боғлиқ жарроҳлик амалиёти ўтказилган. Таъкидланишича, ҳозирда КХДР етакчиси соғлиғини қайта тикламоқда.

CNN’нинг маълум қилишича, Ким Чен Ин сўнгги марта 11 апрель куни оммага кўриниш берган. Шунингдек, у Ким Ир Сен туғилганига 108 йил тўлиши муносабати билан 15 апрелдаги маросимни ўтказиб юборган.

18 апрель куни Трамп Оқ уйда ўтказилган брифинг чоғида Ким Чен Индан «яхши мактуб» олганини ҳамда КХДР раҳбари билан яхши муносабатда эканлигини билдирган. Бироқ Ким Чен Ин АҚШ президентига ҳеч қандай мактуб ёзмаганини маълум қилган.