Ўзбекистонда коронавирусдан тузалганлар сони 127 кишига етди

Коронавирус билан хасталаниб, Бухоро вилояти юқумли касалликлар шифохонасида даволанган яна 20 нафар бемор буткул соғайди. Улар 16 апрель куни вилоят соғлиқни сақлаш бошқармаси масъуллари иштирокида реабилитацияга кузатилди. Бу ҳақда Соғлиқни сақлаш вазирлиги хабар берди.

Тузалганларнинг барчаси чартер рейс орқали Туркиядан Бухорога келган бўлиб, «Ситораи Моҳи Хоса» санаторийсида карантинга олинган эди. Коронавирус инфекцияси тасдиқлангач, улар вилоят юқумли касалликлар шифохонасига жойлаштирилган. Беморларнинг 10 нафари эркак, 10 нафари аёллардир.

Уларнинг 11 нафари Тошкент шаҳри, 4 нафари Самарқанд вилояти, 2 нафари Жиззах вилоятидан, Қашқадарё, Навоий ва Тошкент вилоятларидан эса 1 нафардан фуқаро тузалганлар қаторидан ўрин олган. Улар орасида энг ёши каттаси 57 ёшда бўлса, энг кичиги 21 ёшда. Бухоро вилоят юқумли касалликлар шифохонасидан шу пайтга қадар 8 нафар бемор соғайган бўлса, эндиликда уларнинг сони 28 нафарга етди.

Вазирликнинг маълум қилишича. 16 апрель куни яна бир қатор шифохоналарда соғайган беморларнинг реабилитацияга кузатилиши кутилмоқда. Айни пайтга қадар Ўзбекистон бўйлаб коронавирус инфекциясидан жами 127 нафар бемор тўлиқ соғайди.

Ўзбекистонда 16 апрель соат 10:00 ҳолатига кўра, коронавирус инфекциясини юқтириб олганлар сони 1349 нафарга етди. Ўзбекистонда ўтган бир ой давомида коронавирусга чалинган беморларнинг тўрт нафари вафот этди, 15 апрель куни коронавирусдан тузлаганлар сони 107 кишига етган эди. Бундан ташқари, хорижда камида 23 ўзбекистонликда коронавирус аниқланган, уларнинг уч нафари вафот этган.