Миллий масс-медиани қўллаб-қувватлаш ва ривожлантириш жамоат фонди томонидан «Хавфсиз ёрдам» лойиҳаси доирасида республика бўйлаб ижтимоий ҳимояга муҳтож, фарзандларини ёлғиз тарбия қилаётган, ишсиз қолган минг нафар аёлга мингта UzCard карточкалари тайёрланиб, улар учун жами 1 миллиард сўм ўтказиб берилади. Ўн кун ичида карталар ўз эгаларига етказилади. Бу ҳақда фонд матбуот хизмати «Дарё»га маълум қилди.

Фото: Миллий масс-медиани қўллаб-қувватлаш ва ривожлантириш жамоат фонди

Миллий масс-медиани қўллаб-қувватлаш ва ривожлантириш жамоат фонди ёрдамнинг тубдан янги шаклини ишлаб чиқди ва жорий этди. Бу стратегия пандемия даврида ёрдам олаётганлар билан ўзаро контактларни қисқартиришга имкон беради, чунки карантин қоидаларига риоя қилиш ва ижтимоий масофа сақлаш жуда муҳимдир.

Бугунги таҳликали кунларда ўн минглаб одам бир-бирига ёрдам қўлини чўзмоқда, қалбининг бир парчасини бериб, бир-бирини қўллаб-қувватламоқда. Энг муҳими эса одамлар нафақат ёрдам беришмоқда, балки борини баҳам кўришмоқда. Улашиш бу — муҳтож бўлган кишига ёрдам бериш учун ўзининг фаровонлигининг бир қисмини беришни англатади.

Меҳрибонлик ва саховат халқимизнинг ажойиб белгиларидир. Ҳозир қийин аҳволда бўлганларга ёрдам бераётган барчадан жуда миннатдормиз. Пандемия бизга учрашишга, бир-биримизникига ташриф буюришга, қариндошларимизни бағримизга босишга имкон бермайдиган ўз қоидаларини ўтказмоқда. Биз ёрдам контактсиз, масофада ва айни пайтда самарали бўлиши учун нима қилиш кераклигини ўйлай бошладик. Шу тариқа «Хавфсиз ёрдам» лойиҳаси пайдо бўлди.

Саида Мирзиёева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари

Фото: Миллий масс-медиани қўллаб-қувватлаш ва ривожлантириш жамоат фонди

Хайрия ёрдами учун ўзига хос сегментни танлашга қарор қилинди — бу карантин туфайли қийин молиявий аҳволга тушиб қолган аёллар. Пластик картани расмийлаштириш имконига эга бўлмаган, телефони ёки интернети йўқлар. Бу аёлларни шахсий пластик карточкалари билан таъминлаш ва уларга бир миллион сўмдан пул ўтказиб бериш вазифаси қўйилди. Ушбу миқдор тахминан етти хайрия пакетининг нархига тенг. Нақд пул ёрдами оила учун энг зарур бўлган нарсани сотиб олишга имкон беради. Шахсий пластик карталаридан эса бутун республика бўйлаб чекловларсиз, фойдаланиш муддати тугагунча ва кейинчалик алмаштириш орқали ҳам фойдаланиш мумкин.

Ижтимоий ва молиявий ҳимояга муҳтож аёлларнинг шаклланган базаси асосида манзилли рўйхат шакллантирилди. Унинг лойиҳасини ишлаб чиқишда Ўзбекистоннинг Гендер тенглиги бўйича комиссияси, Тошкент шаҳар ички ишлар бошқармаси ҳуқуқбузарликларнинг олдини олиш бошқармаси, Ҳомийлик кўмаги фаолиятини мувофиқлаштириш маркази катта ёрдам кўрсатди.

Умумий ҳисобда 1000 киши танлаб олинди: Тошкентдан 350 нафар аёл ва ҳар бир вилоятдан 50 кишидан. Ушбу рўйхатдан 25 ёшдан 55 ёшгача бўлган, даромад манбайига эга бўлмаган, аммо болалари бўлган, шунингдек, яқинда қамоқдан озод қилинганлар киради.

Фото: Миллий масс-медиани қўллаб-қувватлаш ва ривожлантириш жамоат фонди

Барча муҳтожларнинг паспорт нусхаларини тўплаш имкони бўлмаганлиги сабаб Ҳуқуқбузарликлар профилактикаси бошқармаси банкка карточкаларни дастлабки расмийлаштириш учун №1 форма шаклида тақдим этди, бу ҳужжат паспорт бериш учун асос бўлиб, барча зарур маълумотларни ўз ичига олади. Бошқарма ва «Капиталбанк» ички протоколларни бузмасдан махфийлик тўғрисидаги шартномани имзолади.

«Хавфсиз ёрдам» хайрия лойиҳаси доирасида UzCard ЯУПМ тайёр пластик карточкаларни тақдим этди. Карталар фонд дизайнерлари томонидан безатилгач, муҳтожлар номига расмийлаштирилди.

Дарҳол ҳар бир картага маблағ ўтказилди ва банк мутахассислари профилактика инспекторлари билан биргаликда уларни Тошкент шаҳридаги манзилларга тарқатди. Банк барча шартномаларни имзолади ва шундан сўнг паспорт сканерларини олди. Вилоятлардаги ёрдамга муҳтож аёлларга карталарни тезда топширишда Ички ишлар вазирлиги ёрдам кўрсатди.

Фото: Миллий масс-медиани қўллаб-қувватлаш ва ривожлантириш жамоат фонди

Қийин даврда ҳар қандай ёрдам бебаҳодир. Аммо айнан ушбу хайрия шакли универсал, самарали ва барча учун анча хавфсиздир. Умид қиламизки, бошқа ташкилотлар бизнинг намунамизга эргашади ва мақсадли ёрдам учун уларнинг рўйхатини тузади. Биз, ўз навбатида, ишлаб чиқилган стратегияни баҳам кўришга тайёрмиз.

Комил Алламжонов, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси 

Фото: Миллий масс-медиани қўллаб-қувватлаш ва ривожлантириш жамоат фонди

«Капиталбанк» томонидан тақдим этилган карталар бўйича навбатдаги хайрия транши 20 кун ичида амалга ошириш режалаштирилган. Профилактика инспекторлари пул тушгани тўғрисида ўз ҳудудларидаги муҳтожларга вақтида хабардор қилади.