Ўзбекистон ва Буюк Британия тиббиёт ходимлари 13 апрель, душанба куни, коронавирусга қарши курашиш масалаларини муҳокама қилди, деб хабар бермоқда ТИВ матбуот хизмати.
Қайд этилишича, видеоконференция тарзида ташкил этилган ушбу муҳокамада икки давлат мутахассислари коронавирусга қарши курашиш борасида қўлланилаётган чоралар, ташхис қўйиш ва касалларни даволаш бўйича тиббиёт муассасаларининг фаолияти тўғрисида батафсил ахборот алмашди.
Британиялик мутахассисларда ўзбекистонлик ҳамкасбларининг беморларни касалликдан тузалган кишиларнинг қон плазмаси орқали даволаш бўйича илмий тадқиқотлари ва мамлакат шифохоналарида ушбу услубни кенг жорий қилиш борасидаги режалари катта қизиқиш уйғотди.
Томонлар келгусида ҳам алоқада бўлиш ва доимий асосда шу каби тадбирларни ўтказиб туришга келишди.
Эслатиб ўтамиз, Ўзбекистондаги бир қатор тажрибали олим ва шифокорлар билан келишилган ҳолда тез кунларда мутлақо янгича усул — коронавирусдан соғайган инсонларнинг қон зардобини хасталиги оғир кечаётган беморларга қуйиш амалиётини жорий этиш бошланиши хабар берилган эди.
Айни пайтда Ўзбекистонда коронавирусга чалинганлар сони 1113 кишига етди, беморларнинг 99 нафари тузалди. Дунё бўйича эса касалланганлар сони 1 миллион 934 минг кишидан ошди.
Изоҳ (0)