Олдинроқ Ўзбекистоннинг Нью-Йорк шаҳридаги Бош консулхонаси 6 апрель куни 1969 йилда туғилган Ўзбекистон фуқароси Р.Х. коронавирус инфекциясини юқтириб олиш натижасида маҳаллий клиникада вафот этганини маълум қилганди. Нью-Йоркдаги ўзбекистонликлар ҳамжамияти вакиллари «Дарё»га ушбу шахс машҳур қўшиқчи, шашмақом ижрочиси Рустам Самарқандий эканини маълум қилди.
51 ёшли Рустам Ҳожимамедовда 22 март куни касалликнинг биринчи аломатлари қайд этилган эди, унинг соғлиғи кескин ёмонлашиши муносабати билан 2 апрель куни у касалхонага ётқизилиб, ўпкани сунъий шамоллатиш аппаратига уланган ва сунъий комага туширилган эди. Аммо бу фойда бермади ва бемор 6 апрель куни оламдан ўтди.
Рустам Ҳожимамедов Рустам Самарқандий тахаллуси остида ижод қиларди. У машҳур ҳофиз Абрам Толмасовнинг шогирди ҳисобланарди. Рустам Самарқандий ширали овози ҳамда мумтоз куйларни ижро этиш маҳорати билан машҳур эди.
Ҳозирги пайтда Бош консулхона диаспорал ташкилотлар раҳбарлари ва фаоллари билан биргаликда унинг дафн маросими билан боғлиқ ташкилий масалаларни ҳал қилмоқда.
Аввалроқ Нью-Йоркда икки ўзбекистонлик (бир аёл ва бир эркак) коронавирусдан вафот этгани ҳақида хабар берилган эди. Шундай қилиб, Рустам Самарқандий Нью-Йоркда ва умуман чет элда коронавирусдан вафот этган учинчи Ўзбекистон фуқароси бўлди.
Умуман олганда, хорижий давлатларда бўлиб турган 23 нафар Ўзбекистон фуқаросида коронавирус аниқланган, улардан 3 нафари вафот этган. Айни пайтда қуйидаги мамлакатларда бўлиб турган ўзбекистонликларда касаллик аниқланган:
- Австрия — 1 нафар;
- Арманистон — 1 нафар;
- АҚШ — 10 нафар;
- БАА — 1 нафар;
- Жанубий Корея — 1 нафар;
- Покистон — 5 нафар;
- Россия — 1 нафар;
- Таиланд — 1 нафар;
- Қозоғистон — 2 нафар.
Ўзбекистоннинг дипломатик ваколатхоналари ушбу фуқаролар ва уларнинг яқинлари билан доимий алоқада бўлиб турибди ва зарур консуллик-ҳуқуқий ёрдам кўрсатмоқда.
Эслатиб ўтамиз, Ўзбекистонда коронавирусга чалинганлар сони 7 апрель соат 15:00 Тошкент вақти билан 10:00 ҳолатига кўра 28 кишига ошиб, 504 нафарга етди.
