Коронавирус сабаб «Ернинг қалтирашлари» пасайгани маълум бўлди
Одамлар кўчаларда деярли тўпланмай қўйди, машиналар ҳаракати камайди — борган сари камроқ одам уйдан ташқарига чиқмоқда ёки шаҳарлараро ҳаракатланяпти. Карантин вақти бутун сайёрада ҳар доимгидан кўра тинчлик ҳукм сурмоқда ва буни ҳатто сейсмографлар ҳам пайқади, деб хабар беради Hi-Tech-Mail.ru.
Мутахассислар Ердаги сейсмик шовқин пасайганини қайд этган. Автомобиллар, поездлар, автобус ва одамлар вибрацияси сайёрага камроқ таъсир кўрсата бошлаган.
Бельгия қироллик обсерваторияси март ойининг ўрталарида — мактаб ва корхоналар ёпила бошлаганида шовқин даражаси 30—50 фоизга камайганини таъкидлаган. Бу турдаги кўрсаткичлар йилда фақат бир маротаба — Рождество байрамида кузатилади.
Инсоннинг Ерга таъсири камайгани олимларга ёрдам бермоқда. Эндиликда сайёрада пайқаш қийин бўлган ер ости силкинишлари ва бошқа сейсмик фаолликларни ҳам кузатиш осонлашган.
Дунёнинг турли нуқталарида жойлашган шаҳарларда ҳам худди шу каби жараён кузатилган. Масалан, Лондон ва Лос-Анжелесдаги сейсмологлар ҳам вибрация камайганини қайд этган.
