Тошкентда 1 апрель куни Вирусология илмий-текшириш институти клиникасида даволанган коронавирусга чалинган тўрт нафар бемор бутунлай соғайиб, Республика ихтисослаштирилган терапия ва тиббий реабилитация илмий-амалий тиббиёт марказига кузатилган эди. «Ўзбекистон 24» телеканали уларнинг айримларидан қисқа интервью олди.
«Биз ҳақимизда қайғурган давлатимиз раҳбарига катта раҳмат. Биринчи галда ҳаммамизга узоқ умр тилайман. Бевақт ўлимлардан, бедаво дардлардан ҳаммамизни Худонинг ўзи сақласин», — деди коронавирусдан соғайган беморлардан бири «Ўзбекистон 24»га берган интервьюсида.
«Ҳаммаси жойида, клиникада яхши қарашди. Ўз вақтида муолажалар қилиб, оёққа турғазишди. Шифокорларга, ичкарида қолиб мана шу касалликка қарши курашаётган ҳаммага катта раҳмат. Миннатдорман», — дея қўшимча қилди.
Соғлиқни сақлаш вазирлиги маълумотларига кўра, коронавирусдан соғайган тўрт кишининг бири БААнинг Дубай шаҳридан, яна бири Туркиядан келган, қолган икки нафари эса коронавирус инфекцияси аниқланган бемор билан яқин мулоқотда бўлган фуқаролардир. Шундай қилиб, Ўзбекистонда коронавирусдан соғайган беморлар сони 12 нафарга етди.
Маълумот учун, 2 апрель ҳолатига кўра Ўзбекистонда коронавирусга чалинганлар сони жами 190 нафарга етган, уларнинг икки нафари вафот этган. Маълумотларга кўра, яқин вақт ичида яна 10 га яқин беморнинг тўлиқ соғайиши кутилмоқда.
Изоҳ (0)