O‘zbekistonliklarga karantin qoidalari barcha holatlarga taalluqli bo‘lishi va fuqarolarga bu paytda boshqa viloyatlardagi dafn marosimlarida ishtirok etishga ruxsat berilmasligi aytildi. Bu haqda AOKA huzuridagi shtabda 1-aprel, chorshanba kuni, o‘tkazilgan brifingda IIV axborot xizmati rahbari Shohrux G‘iyosov ma’lum qildi.
“Karantin cheklovlari xalqaro tajriba va talablarga asosan o‘rnatilgan. Afsuski, qanchalik og‘ir bo‘lmasin, o‘rnatilgan cheklov barchaga istisnosiz taalluqli bo‘lib, boshqa viloyatda bo‘lgan yaqin qarindoshlaringizning dafn marosimida qatnasholmaysiz”, — deydi u.
Shuningdek, og‘ir kasal bo‘lgan bemorga tibbiyot muassasasidan javob berilgan holatda uni bir viloyatdan ikkinchisiga olib o‘tish tartibi ham tushuntirildi.
“Agar siz og‘ir kasal bo‘lgan fuqaroni, masalan, Toshkent shahridan o‘zining doimiy yashaydigan boshqa viloyatiga olib bormoqchi bo‘lsangiz, uning haqiqatan o‘sha viloyatda ro‘yxatda turganini isbotlovchi pasporti va sog‘liqni saqlash xodimlarining tegishli xulosasi asosida postlardan olib o‘tishingiz va uyiga eltib qo‘yishingiz mumkin”, — dedi Shohrux G‘iyosov va kasalni uyiga olib borgan fuqaro karantin cheklovlari tugamagunicha ortga qaytolmasligini ta’kidladi.
Mavzuga doir:Koronavirusdan vafot etgan kishi qanday dafn etiladi? O‘zbekiston musulmonlari idorasi javob berdi
Izoh (0)