Қозоғистоннинг Олмаота шаҳрида карантин режимини бузган уч нафар Ўзбекистон фуқароси қўлга олинди, деб хабар бермоқда Kazinform.
Ҳуқуқ-тартибот идоралари ходимларининг сўзларига кўра, шаҳарда фавқулодда ҳолат эълон қилинганига қарамай ўтиш пунктларини ноқонуний четлаб ўтганлар ҳали ҳам учраб турибди.
«Алатау туманида Ўзбекистоннинг уч фуқароси қўлга олинди. Улар Бурундай микрораёнида жойлашган 3-станцияни четлаб ўтиб, шаҳарга киришга ҳаракат қилишди. Бироқ бу уриниш натижа бермади.
Улар иш излаб Олмаотага келишган. Айтишларича, карантин ҳақида билишмаган. Албатта, бу уларни жавобгарликдан озод қилмайди», — деган Алатау тумани ички ишлар бошқармаси бошлиғи Улан Абилқайир.Қайд этилишича, ушбу фуқаролар Маъмурий ҳуқуқбузарлик тўғрисидаги кодекснинг 476-моддаси (Фавқулодда ҳолат режимини бузиш) бўйича маъмурий жавобгарликка тортилди ва улар маъмурий қамоққа олинди.
Эслатиб ўтамиз, Қозоғистонда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинган. Бугунги кунда мамлакатда коронавирус билан касалланганлар сони 348 кишига етди, 3 киши вафот этди.
Изоҳ (0)