«Дарё» ҳафта твитлари рукнида микроблогнинг ва умуман дунёнинг асосий мавзусига айланган коронавирус ҳақида айтилган энг муҳим фикрларни келтиради.

Буюк Британия бош вазири Борис Жонсон #UYDAQOLINGHAYOTLARNIASRANG ҳештеги остида изоҳ қолдирди: «Биз биргаликда бу мураккаб даврдан ўтиб оламиз ва вирусни мағлуб қиламиз. Жангда ғолиб бўлиш учун сизлар маслаҳатимизга амал қилишингиз керак, имкон борича уйда қолинг. Сиз уйда қолсангиз, мамлакатимиз вирусдан шу даражада тезроқ тузалади».

«Мальорка, Испанияда полиция карантинда уйда қолаётган аҳолини хавотирларига барҳам бериш ва уларнинг кўнглини олиш учун шундай тадбирлар уюштирмоқда», – Stance Grounded, Twitter фойдаланувчиси.

«Дунё бўйлаб COVID-19 қурбонлари сони ортиб бормоқда», – World Index, статистика саҳифаси.

Италия – 5476

Хитой – 3261

Испания – 1756

Эрон – 1685

Франция – 674

АҚШ – 412

Буюк Британия – 281

Нидерландия – 179

Корея – 104

Швейцария – 98

Германия – 93

Бельгия – 75

Индонезия – 48

Япония – 36

«Канада агар Олимпияда кейинги йилга қолдирилмаса, унда иштирок этмасликни билдирди»,  – Фарҳод Файзуллаев, блогер.

«Қозоғистонда коронавирус билан боғлиқ 60 ҳолат аниқланди», – K-News нашри.

«Италия ўз тарихидаги энг қора кунларни бошидан кечираётган бир пайтда италянлар ёлғиз эмаслигини ҳис қилди. Кубалик докторлар Италияга фақат бир мақсадда, қўлдан келганича кўплаб инсонлар ҳаётини сақлаб қолиш учун келди», – P Kelly, Twitter фойдаланувчиси.

«Ёши катта авлодга мурожаат. Москва шаҳар ҳокимияти 65 ёш ва ундан катталар учун COVID-19 шароитида 4 минг рубл миқдоридаги бир марталик моддий ёрдам беради», – Сергей Собянин, Москва шаҳар ҳокимияти.

«Турмуш ўртоғимда коронавирус аниқланди. Мен уни севаман ва унинг олдида бўла олмаслигим ҳозирги шароитида энг машаққатли синовлардан биридир. Кўпчилик бу касалликни бошидан кечирмоқда ва вазият ёмонлашмоқда. Мен унинг соғайиб кетиши учун дуо қиламан, сиз ҳам дуо қилинг. Шу билан бирга қўлимдан келганича америкаликларга ёрдам беришга ҳаракат қиламан», – Эми Клобушар, АҚШ президентлигига номзод.

«Смартфон иловалари асосида фаолият юритаётган ишчилар бугунги давр тақозоси билан хизмат кўрсатишнинг олди қаторига чиқди. Одамларни ташиш, озиқ-овқатларни етказиб бериш ижтимоий муҳофазаланиш каби одатга айланди. Аммо федерал ва штат қонунчилигига кўра, агарда улар касалликка чалинадиган бўлса, касаллик даври учун олинадиган меҳнат нафақасини ололмайди», – Бред Ландер, Нью-Йорк шаҳри депутати.

Жаҳон соғлиқни сақлаш ташкилоти раиси Тедрос Адханом Гебреюсус:

«COVID-19 шароитида муҳофазаланиш учун бир қатор тадбирлар мавжуд. Улардан энг муҳими мунтазам ва хавфсиз қўллар гигиенасидир. Бу ерда #WHO тавсия қиладиган маслаҳатлар бор. Бутун дунёга қаерда ва қандай қўл ювишингизни кўрсатинг. Жаҳон соғлиқни сақлаш ташкилотининг #Хавфсиз Қўллар ҳештеги остида ўтказилаётган флешмобига қўшилинг».

«Ўзбекистонда кейинги икки ой мобайнида ҳеч ким интернет ва телефон хизматидан узиб қўйилмайди. Қарздорлик ҳолати узайтирилади», – Никита Макаренко, блогер.

«Ўзбекистон дўстларим, уйда қолинг! У соғлиқ ва ҳаёт учун муҳимдир!», –  Жон Макгрегор, Европада хавфсизлик ва ҳамкорлик ташкилотининг Ўзбекистондаги координатори.

«Коронавирус пандемиясининг кутилмаган натижаси – глобал миёсдаги заҳарли газлар ва ифлослантирувчиларнинг кескин камайиши кузатилмоқда», – Duetsche Welle радиоси.

«Январь ойида, Дональд Трамп коронавирус билан боғлиқ вазият ‘батамом назорат остида’ эканини айтган эди. Февраль ойида президент бу вирус йўқолиб кетиши ҳақида гапирди. Ҳозирда эса ‘агар билганимизда эди, бу вирусни осонлик билан тўхтатган бўлар эдик’, демоқда. Дональд Трамп билганди. Унинг ҳаракати муваффақиятсизликка учради. Ҳозирда биз бунинг бадалини тўлаяпмиз», – Жо Байден, Америка вице-президенти, президентликка номзод.

«Европа Иттифоқи Жаҳон соғлиқни сақлаш ташкилотига соғлиқни сақлаш соҳаси ожиз бўлган мамлакатларда коронавирус муаммоасини бартараф қилиш учун 114 миллион евро миқдорида ёрдам беради. Яна 15 миллион евро миқдоридаги маблағ Африкада ташхисни тезда аниқлаш ва эпидемиологик назорат учун Дакардаги Пастер институтига ажратилади», – Урсула фон дер Ляен, Европа Иттифоқи кенгаши президенти.

Жаҳонгир Эргашев тайёрлади.