Арманистонда коронавирусга чалинган биринчи бемор вафот этди. Бу ҳақда «РИА Новости» хабар берди.

Фото: Sputnik

Маълум қилинишича, вафот этган бемор 72 ёшли аёл бўлган. У коронавирусдан ташқари нафас йўллари ва юрак-қон томир касалликлари билан оғриган. Айнан ана шу сурункали касалликлар беморнинг ҳаётини сақлаб қолишга имкон бермаган.

Аёл 26 март, пайшанба куни, вафот этган. У бир кун аввал жонлантириш бўлимига ётқизилган ва аҳволи ўта оғир бўлган.

Арманистонда коронавирус тарқалишига қарши курашиш учун 16 мартдан 14 апрелгача фавқулодда ҳолат эълон қилинган. Сўнгги маълумотларга кўра, мамлакатда мазкур инфекция билан 290 киши касалланган.

Дунё бўйлаб коронавирус оқибатида вафот этганлар сони 21 минг кишидан ошди. АҚШ Сенати коронавирусга қарши 2 триллион долларлик ёрдам дастурини маъқуллади. Исроил эса бутунлай ёпилиши мумкин.