Қозоғистон ахборотлаштириш ва жамият тараққиёти вазири Даурен Абаев қозоғистонлик аёлнинг коронавирус инфекцияси туфайли вафот этганини маълум қилди, деб ёзмоқда Tengrinews.
«Қадрли юртдошлар, бу фавқулодда брифинг. Афсуски, бугун Қозоғистон фуқароси бўлган аёл киши коронавирусдан вафот этди. Аёлнинг қариндошлари ва яқинларига чуқур ҳамдардлик билдирамиз. Бу жуда оғир йўқотиш, ҳаммамиз қайғудамиз. Эртага Нур-Султон соғлиқни сақлаш бошқармаси тиббиёт хулосалари бўйича батафсил маълумот беради. Ушбу ҳолат коронавируснинг нақадар хавфли инфекция эканидан далолат бермоқда. Ҳозир содир бўлаётган воқеаларнинг ҳаммаси барчамиз учун синов», — дея таъкидлаган Даурен Абаев «Хабар 24» телеканалидаги чиқишида.
Нур-Султон вақти билан соат 16:20 да Қозоғистон соғлиқни сақлаш вазирлиги коронавирус юқтириб олиш бўйича 12 та янги ҳолат қайд этилгани ҳақида хабар берган ва мамлакатда COVID-19 билан касалланганларнинг умумий сони 109 нафарга етганди.
Коронавирус юқтириб олиш ҳолати Нур-Султон ва Олмаотада кузатилган, мос равишда 61 ҳамда 40 нафар одам. Икки нафардан коронавирус юқтирган бемор Қарағанда ва Чимкентда, Олмаота, Ақтўбе, Жамбил, Шимолий Қозоғистон вилоятларида эса биттадан бемор COVID-19 билан касаллангани маълум қилинган.
Икки нафар бемор расман касалликдан тузалган ва уларнинг Нур-Султон ҳамда Олмаотада истиқомат қиладиган фуқаролар экани айтилганди.
Олмаота, Нур-Султон ва Чимкентда коронавирусга қарши кураш бўйича янги чеклов чоралари амалга оширилмоқда.
Изоҳ (0)