Ўзбекистонда коронавирус инфекцияси билан касалланганларнинг 30 нафари чет элда бўлиб қайтган. 18 нафар фуқаро эса улар билан яқин мулоқотда бўлиб, вирусни юқтириб олган. Бу ҳақда Соғлиқни сақлаш вазирлиги маълум қилди.

Фото: «Дарё»

Вазирликнинг хабар беришича, ҳозирда ушбу касалликка чалинган 1 нафар 20 ёшли фуқаронинг қайси ҳолатда ушбу инфекцияни юқтирганлиги аниқланмоқда.

Мавзуга доир: Хорижда бўлмаган ва касалланганлар билан гаплашмаган 20 ёшли ўзбекистонлик қиз коронавирус юқтириб олгани маълум бўлди

Маълум қилинишича, хорижда бўлиб қайтган бир нафар фуқародан унинг камида 14 нафар оила аъзоси ва яқинларига коронавирус юққан. Бунда гап, катта эҳтимол билан, 11 март куни Франциядан қайтган биринчи бемор ҳақида бормоқда.

Эслатиб ўтамиз, Ўзбекистонда вирусдан зарарланишнинг илк ҳолати Париждан 11 март куни учиб келган фуқарода қайд этилган. Кейинроқ Лондон, Истанбул, Дубай ва Москвадан келган авиарейслар йўловчиларида ва улар билан мулоқотда бўлганларда вирус аниқланди. 22 мартда уларнинг қаторига Швейцарияда бўлиб қайтган бемор ҳам қўшилди.

Мавзуга доир: Соғлиқни сақлаш вазирлиги коронавирусга чалинган ўзбекистонликлар ҳақида қўшимча маълумот берди

Эслатиб ўтамиз, Ўзбекистонда коронавирус инфекциясини юқтириб олган шахслар сони 49 нафарга етди. Улардан беш нафари тузалди. 24 мартдан Ўзбекистонда коронавирус инфекцияси тарқалишига қарши кучайтирилган тартиб жорий этилди, деҳқон бозорларидан ташқари барча бозорларнинг фаолияти тўхтатилди.

Тузатиш: Соғлиқни сақлаш вазирлиги ахборотига асосланиб тайёрланган ушбу хабарнинг биринчи таҳририда хориждан келган яна бир эр-хотиндан уларнинг етти нафар оила аъзосига коронавирус юққани ҳақида таъкид бор эди. Вазирлик ўз ахборотидан ушбу ахборотни ўчириб ташлади, шу боис «Дарё» хабарни таҳрирлаб, таъкидни олиб ташлади.