Коронавирус ва спорт: Қолдирилган Суперлига, бўм-бўш «Humo Arena» ва Тожикистонга қарши сир тутилган ўртоқлик ўйини

Коронавирус пандемияси спорт бўйича кўплаб мусобақаларнинг бекор бўлишига сабаб бўлмоқда. Қуйида коронавируснинг спортга таъсири борасидаги сўнгги маълумотлар тақдим этилади.

Ўзбекистондаги барча спорт мусобақалари бекор қилинди

15 март, якшанба куни Ўзбекистонда коронавирус юқтириб олиш билан боғлиқ илк ҳолат кузатилди. Шу сабаб, 16 мартдан эътиборан барча оммавий тадбирлар қатори спорт мусобақалари ҳам қолдирилди.

Жисмоний тарбия ва спорт вазирлиги қарорига кўра, Ўзбекистондаги барча спорт муассасалари номаълум муддатга ёпилди, мамлакат чемпионатлари тўхтатилди. Шунингдек, футбол бўйича Суперлига ва бошқа биринчиликлар қолдирилди.

Тожикистон футбол федерациянинг маълум қилишича, 31 март куни Ўзбекистон терма жамоасига қарши Тошкентда ўтказилиши керак бўлган ўртоқлик баҳси бекор қилинган. Маълум бўлишича, Ўзбекистон футбол ассоциацияси коронавирус сабаб мамлакатда юзага келган ҳолат туфайли шу қарорга келган.

Қизиғи шундаки, бу ўйин ўтказилиши ҳақида аввалроқ ҳеч қаерда маълум қилинмаганди. Аслида Вадим Абрамов бошчилигидаги терма жамоа 31 март куни ЖЧ—2022 саралаш босқичи доирасида Яманга қарши ўйнаши керак эди, бироқ мазкур баҳслар ФИФА ва ОФК қарорига кўра қолдирилганди.

Бекор бўлаётган мусобақалар

Футбол бўйича Бразилия чемпионати коронавирус туфайли номаълум муддатга қолдирилди. Чемпионат қачондан давом эттирилиши кейинроқ маълум бўлади. Шунингдек, Кубок баҳслари ҳам қолдирилган. 16 март ҳолатига кўра, Бразилияда 218 киши коронавирус юқтириб олган.

Футбол бўйича Мексика ва Жазоир чемпионатлари ҳам тўхтатилди.

Хитой баскетбол лигаси январь ойи сўнггида бекор қилинган мусобақани 2 апрелдан давом эттирмоқчи. Бу борада легионер баскетболчиларга огоҳлантириш хати юборилган. Агар спортчилар айтилган вақтда клуб тасарруфига етиб келмаса дисквалификация қилинади.

Коронавирус туфайли юзага келаётган вазиятга бефарқ бўлаётган кам сонли мамлакатлардан бири Россия бўлиб турибди. Мамлакатда РПЛ ва КХЛ каби йирик мусобақалар давом этмоқда.

Евро—2020 қолдириладими?

Европада футбол бўйича мусобақалар деярли барча жойда тўхтатилди. Айни дамда ёзда ўтиши керак бўлган Евро—2020 мусобақасининг қолдирилиш масаласи бош мавзуга айланган. УЕФА бу борада 17 март, сешанба кунги йиғилишда қарор қабул қилиши хабар қилинмоқда.

Бу масалада Италия футбол федерацияси президенти Габриэле Гравина УЕФАга мусобақани қолдиришни маслаҳат берди. Бунинг эвазига Италия ёзда А Серия ўйинларини ўтказиб олмоқчи. Аввалроқ А Серия ўйинлари 3 апрелга қадар тўхтатилганди.

Айни вақтда Италияда коронавирусга чалинганлар сони 24747 кишига етган, 1809 нафар одам вафот этган бўлса, 2335 киши тузалишга муваффақ бўлган.

Коронавирусга йўлиққан спорт олами вакиллари

«Валенсия» футбол клуби ҳимоячиси Эсекел Гарай COVID-19 вирусини юқтириб олди. Футболчи бу ҳақда ижтимоий тармоқ орқали маълум қилган ва ўзини яхши ҳис этаётганини таъкидлаган.

Шундан кейин «Валенсия» клубида яна тўртта вирус билан зарарланиш ҳолати қайд этилди. Уларнинг икки нафари футболчи — Элиаким Мангаля ва Хосе Гайя. Бу хабардан кейин «Аталанта» карантин эълон қилган. Аввалроқ жамоалар Чемпионлар Лигаси 1/8 финалида ўзаро баҳс юритганди.

Хоккей ҳақида

Хоккей бўйича ВХЛ Кубогида иштирок этаётган Тошкентнинг «Humo» клуби 15 март, якшанба куни «Звезда»га қарши чорак финал баҳсини томошабинларсиз ўтказди. «Humo Arena»даги баҳсда тошкентликлар мағлубиятга учради (0:2).

Қозоғистоннинг «Барис» хоккей клуби Гагарин Кубоги плей-оффида иштирок этишдан бош тортди. Айни дамда Қозоғистонда фавқулодда ҳолат эълон қилинган ва клуб раҳбарияти мусобақадаги иштирокни тўхтатиш қарорига келган. Қизиғи, КХЛнинг 60 фоизга яқин хоккейчиси мусобақа тўхтатилиши истамоқда, бироқ ташкилот бу масалани кўриб чиққани йўқ.

Швейцариянинг «Бил» хоккей клуби бош мураббийи Антти Термяненда коронавирус аниқланди. 49 ёшли мутахассис уй карантинига олинган, клуб эса 20 мартга қадар барча машғулот ва тадбирларни бекор қилди.