Koronavirus pandemiyasi sport bo‘yicha ko‘plab musobaqalarning bekor bo‘lishiga sabab bo‘lmoqda. Quyida koronavirusning sportga ta’siri borasidagi so‘nggi ma’lumotlar taqdim etiladi.
O‘zbekistondagi barcha sport musobaqalari bekor qilindi
15-mart, yakshanba kuni O‘zbekistonda koronavirus yuqtirib olish bilan bog‘liq ilk holat kuzatildi. Shu sabab, 16-martdan e’tiboran barcha ommaviy tadbirlar qatori sport musobaqalari ham qoldirildi.Jismoniy tarbiya va sport vazirligi qaroriga ko‘ra, O‘zbekistondagi barcha sport muassasalari noma’lum muddatga yopildi, mamlakat chempionatlari to‘xtatildi. Shuningdek, futbol bo‘yicha Superliga va boshqa birinchiliklar qoldirildi.
Tojikiston futbol federatsiyaning ma’lum qilishicha, 31-mart kuni O‘zbekiston terma jamoasiga qarshi Toshkentda o‘tkazilishi kerak bo‘lgan o‘rtoqlik bahsi bekor qilingan. Ma’lum bo‘lishicha, O‘zbekiston futbol assotsiatsiyasi koronavirus sabab mamlakatda yuzaga kelgan holat tufayli shu qarorga kelgan.
Qizig‘i shundaki, bu o‘yin o‘tkazilishi haqida avvalroq hech qayerda ma’lum qilinmagandi. Aslida Vadim Abramov boshchiligidagi terma jamoa 31-mart kuni JCh—2022 saralash bosqichi doirasida Yamanga qarshi o‘ynashi kerak edi, biroq mazkur bahslar FIFA va OFK qaroriga ko‘ra qoldirilgandi.
Bekor bo‘layotgan musobaqalar
Futbol bo‘yicha Braziliya chempionati koronavirus tufayli noma’lum muddatga qoldirildi. Chempionat qachondan davom ettirilishi keyinroq ma’lum bo‘ladi. Shuningdek, Kubok bahslari ham qoldirilgan. 16-mart holatiga ko‘ra, Braziliyada 218 kishi koronavirus yuqtirib olgan.Futbol bo‘yicha Meksika va Jazoir chempionatlari ham to‘xtatildi.
Xitoy basketbol ligasi yanvar oyi so‘nggida bekor qilingan musobaqani 2-apreldan davom ettirmoqchi. Bu borada legioner basketbolchilarga ogohlantirish xati yuborilgan. Agar sportchilar aytilgan vaqtda klub tasarrufiga yetib kelmasa diskvalifikatsiya qilinadi.
Koronavirus tufayli yuzaga kelayotgan vaziyatga befarq bo‘layotgan kam sonli mamlakatlardan biri Rossiya bo‘lib turibdi. Mamlakatda RPL va KXL kabi yirik musobaqalar davom etmoqda.
Yevro—2020 qoldiriladimi?
Yevropada futbol bo‘yicha musobaqalar deyarli barcha joyda to‘xtatildi. Ayni damda yozda o‘tishi kerak bo‘lgan Yevro—2020 musobaqasining qoldirilish masalasi bosh mavzuga aylangan. UEFA bu borada 17-mart, seshanba kungi yig‘ilishda qaror qabul qilishi xabar qilinmoqda.Bu masalada Italiya futbol federatsiyasi prezidenti Gabriele Gravina UEFAga musobaqani qoldirishni maslahat berdi. Buning evaziga Italiya yozda A Seriya o‘yinlarini o‘tkazib olmoqchi. Avvalroq A Seriya o‘yinlari 3-aprelga qadar to‘xtatilgandi.
Ayni vaqtda Italiyada koronavirusga chalinganlar soni 24747 kishiga yetgan, 1809 nafar odam vafot etgan bo‘lsa, 2335 kishi tuzalishga muvaffaq bo‘lgan.
Koronavirusga yo‘liqqan sport olami vakillari
“Valensiya” futbol klubi himoyachisi Esekel Garay COVID-19 virusini yuqtirib oldi. Futbolchi bu haqda ijtimoiy tarmoq orqali ma’lum qilgan va o‘zini yaxshi his etayotganini ta’kidlagan.Shundan keyin “Valensiya” klubida yana to‘rtta virus bilan zararlanish holati qayd etildi. Ularning ikki nafari futbolchi — Eliakim Mangalya va Xose Gayya. Bu xabardan keyin “Atalanta” karantin e’lon qilgan. Avvalroq jamoalar Chempionlar Ligasi 1/8 finalida o‘zaro bahs yuritgandi.
Mavzuga doir: Konor Makgregorning xolasi koronavirusdan vafot etdi
Xokkey haqida
Xokkey bo‘yicha VXL Kubogida ishtirok etayotgan Toshkentning “Humo” klubi 15-mart, yakshanba kuni “Zvezda”ga qarshi chorak final bahsini tomoshabinlarsiz o‘tkazdi. “Humo Arena”dagi bahsda toshkentliklar mag‘lubiyatga uchradi (0:2).Qozog‘istonning “Baris” xokkey klubi Gagarin Kubogi pley-offida ishtirok etishdan bosh tortdi. Ayni damda Qozog‘istonda favqulodda holat e’lon qilingan va klub rahbariyati musobaqadagi ishtirokni to‘xtatish qaroriga kelgan. Qizig‘i, KXLning 60 foizga yaqin xokkeychisi musobaqa to‘xtatilishi istamoqda, biroq tashkilot bu masalani ko‘rib chiqqani yo‘q.
Shveysariyaning “Bil” xokkey klubi bosh murabbiyi Antti Termyanenda koronavirus aniqlandi. 49 yoshli mutaxassis uy karantiniga olingan, klub esa 20-martga qadar barcha mashg‘ulot va tadbirlarni bekor qildi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)