15 март куни Бош вазир Абдулла Арипов томонидан коронавирусга қарши кураш чора-тадбирлари хусусида матбуот анжумани ўтказилган, унда Ўзбекистон хориж давлатлари билан авиа ва автоқатновларни тўхтатишини маълум қилган эди. Давлат божхона қўмитасининг таъкидлашича, ушбу чекловлар савдо юкларининг ҳаракатига таъсир кўрсатмайди.

Фото: «Дарё»

«Мазкур йиғилиш тафсилотлари оммавий ахборот воситаларида эълон қилинганидан сўнг, айрим ташқи иқтисодий фаолият билан шуғулланувчи фуқаролар томонидан экспорт-импорт тартибида транспорт воситаларида ташилаётган юклар ҳам чегарадан ўтказилмас эканда деган ортиқча хавотирлар билдирилмоқда.

Шуни алоҳида таъкидлаш жоизки, мазкур чекловлар юк автомобиллари, авиа, темир йўл, дарё транспортларида юк ташиш билан шуғулланувчи шахслар, уларнинг транспорт воситалари ва ташилаётган ташқи савдо юкларига тааллуқли эмас», — дейилади хабарда.

Чегара ўтказиш ҳудудларида мазкур ташувларни амалга ошираётган шахслар ва уларнинг транспорт воситалари тегишли тартибда текширувлардан ўтказилиб, республика орқали ҳаракатланишига рухсат берилади.

Эслатиб ўтамиз, 15 март куни Ўзбекистонда коронавирусга чалиниш билан боғлиқ биринчи ҳолат қайд этилди. Коронавирус билан касаллангани Ўзбекистонда аниқланган илк бемор — аёл киши, Тошкент шаҳридан. У Францияда бир ҳафтадан ортиқ бўлиб, сўнг Ватанга қайтган. Аёл қайтган рейсда, бирламчи маълумотларга кўра, 48 йўловчи, шунингдек, экипаж аъзолари бўлган. Уларнинг барчаси изоляцияга олинмоқда.