Канада бош вазирининг турмуш ўртоғи Софи Грегуар-Трюдода янги турдаги COVID-19 коронавирус инфекцияси аниқланди. Бу ҳақда бош вазир канцеляриясининг расмий баёнотига таяниб, Global News хабар берди.
Фото: Global Look Press
«Шифокорлар тавсиясидан сўнг Софи Грегуар-Трюдо COVID-19 коронавирус учун тест топширди. Натижалар ижобий чиқди», — дейилади хабарда.
Таъкидланишича, Канада бош вазирининг рафиқаси ўзини яхши ҳис қилмоқда. Бош вазир Жастин Трюдонинг ҳам аҳволи яхши, унда коронавирус аломатлари аниқланмаган. У рафиқаси билан 14 кун давомида карантинда бўлади.
«Уйда карантинда бўлиш — буни бошидан ўтказаётган бошқа канадалик оилалар ва соғлиқ борасида бундан-да жиддий муаммоларга дуч келганлар билан таққослаганда арзимас нарса. Биз ушбу вазиятдан биргаликда чиқамиз», — дейди Софи Трюдо.
Аввалроқ Канада бош вазири рафиқаси билан коронавирусга текширилганидан кейин уйдан туриб ишлашга ўтгани ҳақида хабар берилган эди.
Канада Соғлиқни сақлаш агентлигининг маълумотларига кўра, 12 март ҳолати бўйича мамлакатда 138 кишида коронавирус аниқланган. Уларнинг аксарияти Онтарио ва Британия Колумбияси провинцияларида истиқомат қилади.
Мавзуга доир:
Сўнгги маълумотларга кўра, коронавирус ўчоғи ҳисобланган Хитойнинг Хубэй провинциясида коронавирус тарқалишининг энг юқори чўққиси ортда қолган. Хитойда коронавирус билан касалланганларнинг салкам 78 фоизи соғайгани ҳақида хабар берилган эди.
