«Ювентус» ҳамда Португалия терма жамоаси ҳужумчиси Криштиану Роналдунинг онаси Мария Долореш душ Сантуш шифохонага ётқизилди. Бу ҳақда Mirror хабар бермоқда.
Қайд этилишича, 65 ёшли аёл 3 март, сешанба тонггида бош мияга қон қуйилиши эҳтимоли билан Мадейрадаги шифохонага ётқизилган.
Яқин соатлар ичида Мария Долореш бир неча тестлардан ўтади, шундан кейингина шифокорлар унинг ҳолати ҳақида якуний қарор қабул қилади.
Эслатиб ўтамиз, машҳур футболчининг онаси 2007 йили кўкрак бези саратони билан оғриб, касалликни енгиб ўтганди. 2019 йилда эса Мария Долореш яна ҳаёт учун курашаётгани ҳақида маълум қилди ва навбатдаги даволаниш курсларини ўтайди.
Бу хабардан кейин Роналду 3 март куни Португалияга учиб кетган. О Jogo хабарига кўра футболчи 16:00 да (Тошкент вақти билан 21:00) Мадейрага қўнади. 4 март, чоршанба куни «Ювентус» Италия Кубоги ½ финали доирасида «Милан»га қарши баҳс олиб боради.
Криштиану Роналду — оиладаги тўрт фарзанднинг кенжаси ҳисобланади. Футболчининг отаси Жозе Диниш Авейра 2005 йили ҳаётдан кўз юмган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!