Хитойда тарқалган коронавирус Токио—2020 Олимпиадасининг ўтказилишига таъсир қилмайди. Бу ҳақда Олимпия ўйинлари ижроқўми бош директори Кацура Энё маълум қилди.
«Токиодаги Олимпия ўйинлари ўтказилишига ҳеч қандай ўзгартириш киритилмайди. Мусобақани бекор қилиши ёки қолдириш борасида эса ўйлаётганимиз ҳам йўқ. Менда бу борада ҳеч қандай фикр йўқ», — дея Энё сўзларини келтирмоқда Тасс.
27 февраль, пайшанба куни Халқаро Олимпия қўмитаси (ХОҚ) президенти Томас Бах ташкилот Олимпия ўйинлари ижроқўми позициясини тўлиқ қўллаб-қувватлашини маълум қилди.
Шунингдек, Энёнинг таъкидлашича, Токио—2020 ни кўчириш борасида ҳеч қандай дебатлар олиб борилмаяпти. Япония ҳукумати Олимпия ўйинларига тайёргарлик кўриш учун 12 миллиард доллар сарфлаган.
Токиодаги Олимпиада 24 июлдан 9 августга қадар бўлиб ўтади. Паралимпия ўйинлари эса 25 августдан 6 сентябргача ўтказилади.
Жаҳон соғлиқни сақлаш ташкилоти 27 февраль ҳолатига кўра, жаҳоннинг 48 мамлакатида коронавирус инфекцияси аниқланиб, умумий ҳисобда 82 249 киши вирусни юқтириб олгани ҳақида маълум қилди. Коронавирус сабаб «Ювентус»—«Интер» ва А Сериянинг яна тўртта футбол ўйини томошабинларсиз ўтади. Шунингдек, «Пахтакор»нинг ОЧЛдаги ўйини ҳам мазкур сабаб туфайли қолдирилди.
Изоҳ (0)