Италияда янги турдаги COVID-19 коронавируси оқибатида учинчи одам вафот этди, деб хабар беради Corriera della Sera газетаси.

Фото: AP Photo

Нашрнинг маълумотларига кўра, Италиянинг шимолий қисмидаги Крема шаҳридан бўлган кекса аёл вафот этган. Шунингдек, у онкологик касалликдан ҳам азият чекиб келган.

Аввалроқ Ломбардия ва Венецияда истиқомат қилувчи кекса аёл ва эркак ҳам коронавирус оқибатида вафот этгани ҳақида хабар берилганди.

Сўнгги уч кун ичида Италияда коронавирус билан касалланганлар сони 152 кишига етган. Италия ҳукумати инфекция мамлакатда тарқалгани туфайли фавқулодда чоралар кўрмоқда. Бош вазир Жузеппе Конте коронавирус кузатилган вилоятдан бошқа вилоятга кириш ва чиқишга тақиқ қўйилгани, вирус тарқалган ерларда мактаблар ҳамда ОТМларда дарслар бекор қилинганини ушбу чоралар қаторига киритган. Хусусан, Миландаги мактаблар камида бир ҳафтага ёпилган, деган шаҳар ҳокими Жузеппе Сала.

Коронавирус 2019 йил декабрь охирларида Хитойнинг Хубэй провинцияси Ухань шаҳрида тарқала бошлаган. Коронавирус Хитойнинг материкли қисмидан ташқарида жами 28 мамлакатда кузатилган: АҚШ, Россия, Италия, Франция, Исроил, Эрон, Миср, Испания, Тайван, Япония ва бошқалар. 23 февраль ҳолатига кўра, бутун дунёда жами 78 724 нафар одам коронавирусга чалинган, уларнинг 2,4 минг нафардан кўпроғи ушбу касалликдан вафот этган.