Африка давлатларида сўнгги 70 йилда ёпирилган энг йирик чигирткалар тўдаси сабаб очарчилик бошланиши мумкин

Шарқий Африка мамлакатлари экин майдонларига ёпирилган чигирткалар тўдаси сабаб очарчилик домида қолиши мумкин, деб хабар беради «JP.ru».

«Африка ва Жанубий Осиёга саҳро чигирткаларининг улкан тўдалари ёпирилди. Зараркунандалар аҳолини озиқ-овқат билан таъминлашга мўлжалланган экин майдонларини яксон қилмоқда. Яқин вақт ичида кўплаб мамлакатларда очарчилик бошланиш эҳтимоли мавжуд», — дейилади хабарда.

Sinxua агентлигининг БМТ бош котиби вакили Стефан Дюжаррикка таяниб маълум қилишича, агар ҳашаротлар ҳозир тўхтатилмаса, уларнинг сони ёзнинг биринчи ойига қадар 500 маротабага ошиб кетиши мумкин.

Айни вақтда зараркунандалар оқибатида Эфиопия, Сомали, Кения, Танзания ва Уганда зарар кўрган. Сомалида фавқулодда ҳолат эълон қилинган. Кения учун бу сўнгги 70 йилдаги, Сомали ва Эфиопия учун эса — 25 йилдаги офат.

БМТнинг Озиқ-овқат ва қишлоқ хўжалиги ташкилотлари бўйича (FАО) фавқулодда вазиятлар директори Доминик Бургон ушбу мамлакатлар озиқ-овқат ёрдамига муҳтож бўлиши мумкин деб ҳисобламоқда.

Чигирткаларга қарши йўналтирилган курашлар ҳозирча ҳеч қандай натижа бермади.

Ҳаво орқали пестицидларни сепиш самара бериши мумкин, бироқ минтақадаги давлатларда бунга етарлича ресурс мавжуд эмас.

БМТ инсектицид билан дорилаш ишларини амалга ошириш учун бошқа мамлакатларни Африкага 76 миллион доллар ёрдам пули ажратишларини сўради.