Ўзбекистон Бош прокуратураси Сурхондарё вилоятининг Олтинсой тумани «Халқобод» маҳалласида аҳоли ва ҳокимият вакиллари ўртасида юз берган низоли ҳолат юзасидан баёнот берди.

Кадр: Telegram

Маълум бўлишича, «Оқ-олтин манзараси» фермер хўжалигига қарашли пахта ва ғаллага мўлжалланган экин ер майдонининг жами 0,39 гектари олти фуқаро томонидан ноқонуний равишда эгаллаб олинган, 235,35 квадрат метр майдонида эса яшаш имконияти мавжуд бўлмаган уй-жой бинолари қуриб олинган.

Ҳолат бўйича 8 февраль куни ишчи гуруҳ аъзолари — туман ҳокими Алишер Жумаев, прокурори Т.Бердимуротов, ИИБ бошлиғи А.Мирзаев, ер ресурслари ва давлат кадастр бўлими бошлиғи Ж.Бобомуродов ва бошқалар томонидан ноқонуний қурилиш қилган фуқароларга ушбу ер майдони фермер хўжалиги тасарруфида эканлиги маълум қилиниб, фуқароларнинг ўз ҳисобларидан ўзбошимчалик билан қурилган уйларини бузиб олишларини ва уларга бошқа манзилдан уй қуришлари учун ер берилиши ҳақида тушунтириб ўтилган.

Ноқонуний равишда қурилиш қилиб олган фуқароларнинг илтимосига асосан уларга ўзлари ҳисобидан биноларни бузиб олишлари учун икки кун муддат берилган. Бироқ 14 февраль куни ишчи гуруҳ аъзолари юқорида кўрсатилган манзилга бориб кўрилганида, уч нафар фуқаро ўзбошимчалик билан қурилган уйга яшаш имконияти мавжуд бўлмаган бўлса-да, кўчиб кириб олганлиги аниқланган.

«Ишчи гуруҳ томонидан ноқонуний қурилган уй-жойларни бузиб олишлари тушунтирилганида, аввалдан тўпланиб турган фуқаролар ҳокимият вакили ва ИИБ ходимларига қаршилик кўрсатган», — дейилади Бош прокуратура ахборотида.

Ноқонуний қурилган уйларни бузишни имконияти бўлмаганлиги сабабли ишчи гуруҳ аъзолари ортига қайтиб кетган. Шу куни соат 15:00 чамасида ишчи гуруҳ томонидан юқоридаги манзилга борилганда, юқоридаги фуқаролар ва уларнинг қариндошлари қўлларида бензин, таёқ, белкурак, тош ва бошқа нарсалар билан қуролланган ҳолда ишчи гуруҳ олдига чиқишган.

«Ушбу ҳолатда жамоат тинчлигини сақлаш ва вужудга келиши мумкин бўлган тартибсизликларнинг олдини олиш мақсадида туман ИИБ ходимлари жалб қилинган», — дейилади Бош прокуратура ахборотида.

Ҳокимият вакиллари ва туман ИИБ ходимлари томонидан тушунтирилишига қарамасдан фуқаролар ҳокимият вакиллари ва ИИБ ходимларига қўлларидаги нарсалар билан ташланиб кетишган. Ушбу жараёнда икки нафар туман ИИБ ходимлари ҳамда бир нафар фуқаро тан жароҳати олган.

«Мазкур ҳолат юзасидан ҳозирда Олтинсой тумани прокуратураси томонидан терговга қадар текшириш ҳаракатлари олиб борилмоқда», — дея қўшимча қилинган Бош прокуратура ахборотида.