National Grid хабарига кўра, ўтган 2019 йил Буюк Британия учун энергетик жиҳатдан энг мусаффо йил бўлди. Таъкидланишича, Британия мусаффо энергия соҳасидаги тарихий маррани забт этган. 2019 йилда биринчи марта мамлакатда ишлаб чиқарилган углеродсиз энергия миқдори анъанавий қазилма ёқилғи эвазига ишлаб чиқариладиган энергия миқдоридан ошиб кетди.
Британия 2050 йилга бориб 1990 йилдагига нисбатан чиқинди газ ташлаш миқдорини 100 фоизга қисқартирмоқчи. Бу мақсад йўлида атмосферага углерод оксидлари ташланишига олиб келадиган энергия ишлаб чиқариш турларидан босқичма-босқич воз кечилиши кўзда тутилган. 1990 йил ва 2050 йилнинг қоқ ўртасида туриб, ниҳоят биринчи марта, чиқинди газсиз, мусаффо энергия ишлаб чиқариш ҳажмининг анъанавий кўмир, торф, газ ва бошқа қазилма ёқилғи ёқилиши эвазига ишлаб чиқарилган энергия ҳажмидан зиёда бўлиши, «тарихий натижа» деб баҳоланган.
Хабарда айтилишича, бутун 2019 йил давомида Британия мамлакатларида истеъмол қилинган энергия ҳажмининг атиги 43 фоизи қазилма ёқилғи ёниши эвазига олинган. Яна 8,5 фоиз энергия миқдорини биомасса орқали ҳосил қилинган. Қолган 48,5 фоиз энергия ҳажми эса шамол ва Қуёш электр станциялари, ҳамда, ядро энергетикаси ҳиссасига тўғри келади.
National Grid бош директори Жон Петтигрю бу борада ўз ҳаяжонини яширмаган ва «Ушбу тарихий лаҳзада, нималарга эришганлигимизни мулоҳаза қилиб кўришимиз мумкин», дея таъкидлаган. Сўзининг давомида у «мусаффо энергетикага ўтиш жараёни биз учун хавфсиз ва ишончли энергетика тизими барпо қилиш йўлида бу муҳим аҳамият касб этади», деб фикр билдирган.Йил якунларига бағишланган ҳисоботда National Grid «ноль чиқиндили» энергетика соҳасини қўллаб-қувватлаш учун 1 миллиард фунт-стерлинг инвестиция ажратилишини эълон қилган. Улар 2025 йилга бориб атмосферага мутлақо углерод оксидлари чиқармайдиган энергетика тизими барпо қилмоқчи.
Изоҳ (0)