Бухоро вилоятининг Ғиждувон туманидаги Абдуҳолиқ Ғиждувоний ҳамда «Дегрезон» маҳалласи фуқароларининг «Дарё»га маълум қилишича, аҳоли электр энергияси таъминотидаги узилишлардан азият чекмоқда. Уйни иситиш ва кийимларни дазмоллаш ҳам муаммо бўляпти.
Туманда бўлиб, муаммони ўрганган «Дарё» мухбири Лайло Ҳайитованинг ёзишича, электр таъминотидаги чекловлар аҳолини бездириб қўйган.
Маълум қилинишича, туманда электр узилишларининг расмий жадвали тузилган бўлиб, унда ҳудудлар кесимида бир кунда бир маротаба икки соатгача узиб қўйилиши кўрсатилган. Аҳолига кўра, расмий жадвалда ёзиб қўйилгандек бир кунда бир маротаба эмас, балки 4-5 маротабагача электр энергиясидан узиб қўйиш ҳолати юзага келган.
— Мана, ҳозиргина, бор-йўғи 15 дақиқа олдин «свет»ни ёқишди. Бир кунда бирмас, тўрт-беш маротаба юзага келаётган ўчириб-ёқишлар ҳамманиям асабийлаштиради-да. Бу ҳам етмаганидек ўчириб-ёқишлар ораси бир ярим-икки соатгача давом этади. Бир кунда 6-7 соатгача чироқсиз ўтирамиз, — дейди Маҳбуба Ёдгорова.
Ёши кекса отахон Ўлмас Мадиновга кўра, электр энергияси қўққисдан ўчиб, тасодифан катта кучланишда пайдо бўлади. Оқибатда хонадонидаги музлатгич мотори куйган.
— Гўштни ташқарида, симга илиб қўйиб, истеъмол қилишга мажбур бўляпмиз. Ҳозир қиш фасли, эрта-индин иссиқ кунлар бошланади. Ўшанда озиқ-овқатларни музлатгичсиз қандай асраймиз? Бир ҳовлида саккиз жон яшасак, уни тузатишга қурбимиз етмайди, — дейди Ўлмас Мадинов. — Биз қаердан биламиз бир кунда бир маротаба чироқ ўчирилиши қоғозда ёзилганини, амалда 4-5 марта ўчиб турибди-ку!
Аҳолининг билдиришича, ўтган йилгидек электр энергиясидаги чекловлар ҳудудлардаги трансформаторларга тушаётган катта юкланишлардан бузилиб қолмаслиги учун киритилган. Келгуси йил қиш мавсумига қадар юқори ва кўп қувватли трансформаторларни ишга тушириш ваъда берилган. Хўш, жорий йилда-чи?!
— Тан олиш керак, қиш мавсумида юкланишлар чиндан ҳам юқори даражага кўтарилади. Чунки аҳоли уйларини электр энергияси ёрдамида иситишга ўтади. Бу эса юқори ток кучланиши қувватига эга бўлмаган ҳудудлардаги трансформаторларга талафот етказиши мумкин, — дейди «Бухоро ҳудудий электр тармоқлари» АЖ оператори Элёр Давронов. — Вилоят ҳокимлиги томонидан ҳудудларга электр энергияси тарқатилиши бўйича расмий жадвал тасдиқлаб берилган. Шунга кўра, навбатма-навбат электр энергияси таъминотида чеклов қўйилган. Чеклов қўйишдан мақсад эса манзиллардаги кам кучланишли трансформаторларда юзага келиши мумкин бўлган кўнгилсиз ҳолатларнинг олдини олиш. Айни пайтда катта кучланиш қувватига эга подстанциялар қуриб битказилмоқда. Жорий йилнинг май ойига қадар янги подстанциялар ишга туширилади.
Узилишлар, нафақат, хусусий истеъмолчиларда, балки туман марказида жойлашган қатор корхона, ташкилотлар, давлат муассасаларида ҳам кузатилган. Туман солиқ инспекцияси биносидан ижара шартномаси асосида фойдаланиб келаётган бир нечта партия ташкилотлари, туман «Ҳунарманд» уюшмаси, Маданият бўлими ва бошқа идоралар ҳам бундай чекловлардан ҳоли эмас. Суриштирувга кўра, бу ерда ҳам электр энергиясида узилишлар кузатилади. Устига-устак, газ таъминоти ҳам йўқ. Хоналар совуқ. Батареялар музлаб қолган. Бу меҳнат шароитига таъсир ўтказмай қолмайди.
Исмини ошкор қилишни истамаган «Дарё» ўқувчиларидан бирига кўра, Ғиждувон туман тиббиёт бирлашмасида ҳам электр энергиясида узилишлар учраб туради.
— Йўқ, бу гапга қўшилмайман. Ваҳоланки, туман тиббиёт бирлашмаси электр энергияси улашадиган иккита, туман марказий тармоғи ҳамда Навоий вилояти электр энергияси таъминоти тармоғига уланган. Бундан ташқари, бирлашма трансформатори ўтган йил тўлиқ таъмирланган. Агар туман марказида чироқ ўчирилса, автоматик тарзда, узоғи билан 10-20 секунд ичида иккинчи тармоққа уланади. Шунингдек, туғруқхона, болалар реанимация бўлими, тез тиббий ёрдам кўрсатиш каби ҳар бир бўлимда ЙПСдан фойдаланиш имконияти мавжуд. Балки фақат битта электр энергияси тарқатувчи тармоққа уланган қишлоқ оилавий поликлиникаларида вақтинча узилишлар юзага келаётган бўлиши мумкин, аммо бу масала бизда ҳеч қандай муаммо туғдирмаган, — дейди бирлашма раҳбари Лазиз Нажмиддинов.
Аҳолига кўра, электр энергиясидаги узилишлар август сентябрь ойларида ҳам кузатилган. Сайловлар бошлангандан тугагунга қадар эса бирор маротаба узилиш юзага келмаган. Янги йилдан бошлаб эса бу муаммо яна одамларнинг асосий ташвишига айланган.
— Фақат электр энергиясимас, йўллар носозлигидан ҳам жуда қийналамиз. Айниқса, ёғингарчилик пайтида бу кўчаларда юришнинг ўзи бўлмайди. Ташвишларимизни кимга айтсак, оладиган жавобимиз битта: «Кўриб чиқамиз, ҳал этамиз!»дан нарига ўтишмайди. Ҳатто, депутатимизни танимаймиз ҳам, билмаймиз ҳам — деди фуқаро Гулбаҳор Сафарова.
Ҳудуддан депутатликка сайланган Зикрилла Фузайлов Абдухолиқ Ғиждувоний маҳалласи аҳолиси ташвишидан бехабар. Тумандаги 59-умумий ўрта таълим мактаби директори лавозимида ишлаб келаётган З.Фузайлов ўзини «мактаб ўқитувчиси» деб таништирар экан, тез кунда электр энергияси ва йўл масаласи бўйича аҳолини қийнаётган ташвишларни тегишли ташкилотларга етказиб, уларнинг муаммосини бартараф этишини билдирди.
«Адолат» партиясининг вилоят Кенгаши раҳбарига кўра, Зикрилла Фузайлов «28-Фитрат» сайлов округи депутати этиб сайланганидан ташқари, партиянинг туман Кенгаши раҳбари ҳам экан.
Ўзини тумандаги «Дегрезон» маҳалласи фуқароси деб таништирган Мухлиса Тошева 16 январь, пайшанба куни соат 11:30 ларда қарздорлиги эвазига ўчирилган электр энергияси учун 200 минг сўм миқдорида туман электр тармоқлари кирим кассасига ортиқчаси билан пул тўлаган. Бироқ, соат 16:30 бўлишига қарамай, ёқилмаган. Умумий ўчиришлар етмагандек, қарздорлигини тўлаётган фуқаролар ҳам уланишларни соатлаб кутишмоқда.
Ғиждувон туман электр тармоқлари корхонаси АСКУЭ оператори Равшан Боймуродовга кўра, интернет билан боғлиқ муаммо сабаб, тизим томонидан тармоқни ёқиш учун бир неча маротаба уринилишига қарамай, узилган тармоқларни улашда шундай муаммолар юзага келиб туради.
— Электр энергияси таъминотида юзага келаётган узилишлар учун, аввало, истеъмолчилардан узр сўраймиз. Бугунги кунда «Талимаржон» иссиқлик электр станциясининг электр энергияси ишлаб чиқаришга мўлжалланган қурилмасида юзага келган носозлик туфайли таъмирлаш ишлари олиб борилмоқда. Шу муносабат билан узилишлар тез-тез кузатилмоқда. Носозлик бартараф этилгач, электр таъминоти яхшиланади, — дейди «Дарё» мухбирига «Бухоро ҳудудий электр тармоқлари» АЖ матбуот хизмати раҳбари Беҳруз Абдурасулов.
Изоҳ (0)