Samarqandda bir yilda 41 nafar uylanmoqchi bo‘lgan yigitda OIV infeksiyasi aniqlandi

Samarqandda 2019-yilda 41 nafar uylanmoqchi bo‘lgan yigitda OIV infeksiyasi aniqlandi. Bu haqda viloyat xotin-qizlar qo‘mitasi tomonidan hamkor tashkilotlar, keng jamoatchilik vakillari ishtirokida o‘tkazilgan yig‘ilishda aytildi, deb yozadi “Zarnew”.

2018-yilda esa bu ko‘rsatkich Samarqand viloyat bo‘yicha 61 tani tashkil qilgan. Nikohdan avvalgi tibbiy ko‘rikda aniqlangan mazkur holatlardan so‘ng tomonlar to‘yni to‘xtatgan.

Anjumanda viloyat hokimi o‘rinbosari, xotin-qizlar qo‘mitasi raisi Gavhar Alimova qonuniy nikohdan o‘tmay, shar’iy nikoh bilan turmushga chiqishga rozilik berayotgan xotin-qizlarning keyingi hayotida muammolar sodir bo‘layotganini ta’kidlab o‘tdi.

“O‘tgan yili xotin-qizlar qo‘mitasi tomonidan mingga yaqin shar’iy nikoh bilan yashayotgan oilalar aniqlandi, ularning aksariyatida muammolar bor. Ayniqsa, shar’iy nikoh bilan uylangach, ayolini arzimas sabablar bilan uyiga haydab yuborish, oqibatda ayollarning farzandlari bilan ko‘chada qolish holatlari ko‘p. Bu holatning oldini olish uchun aholi orasida targ‘ibot ishlarini kuchaytirish kerak. O‘tgan yili tegishli hujjati bo‘lmasa-da, nikoh o‘qigan ikki nafar rasman ro‘yxatdan o‘tmagan mullalar qo‘mita tomonidan prokuratura organlariga topshirildi”, — dedi Gavhar Alimova.

“Shar’iy nikohning yana bir salbiy oqibati, nikohlanuvchilarning tibbiy ko‘rikdan o‘tmasligidir. Masalan, o‘tgan yili nikohlanuvchilarning tibbiy ko‘rikdan o‘tishi natijasida 41 nafarida OIV infeksiyasi aniqlangan. Agar tibbiy ko‘rikdan o‘tmasa, bu raqam 82 ta bo‘lardi. Natijada to‘y qoldirildi. Bundan tashqari, bir qator ijtimoiy kasalliklar aniqlanib, nikohlanuvchilarga ma’lum qilingan. Tasavvur qiling, agar qonuniy nikohdan o‘tmay, shar’iy nikoh bilan turmush qurgan yoshlarda shunday, ijtimoiy xavfli xastaliklar uchrasa, o‘zi bilib, ehtimol bilmagan holatda yana bir insonni ushbu xastalikka duchor qiladi. FHDYo organlari orqali nikohdan o‘tayotgan yoshlar esa albatta, tibbiy ko‘rikdan o‘tishga majbur”, — deydi viloyat sog‘liqni saqlash boshqarmasi boshlig‘i o‘rinbosari S.Mo‘minov.

Yig‘ilishda joylarda bu masalaga jiddiy e’tibor qaratish lozimligi bo‘yicha tegishli tashkilotlarga vazifalar belgilab berildi.