«Атом энергиясидан тинчлик мақсадларида фойдаланиш тўғрисида»ги қонун қабул қилиниши муносабати билан Маъмурий жавобгарлик тўғрисидаги кодексга қўшимча ва ўзгартириш киритилади.
Норматив-ҳуқуқий ҳужжатлар муҳокамаси порталида жойлаштирилган ҳужжат лойиҳасига кўра мазкур кодекс қуйидаги мазмундаги 55-1-модда билан тўлдирилади:
«55-1-модда. Атом энергиясидан фойдаланиш соҳасидаги нормалар ва қоидаларни бузиш
- атом энергиясидан фойдаланиш соҳасидаги нормалар ва қоидаларни бузиш — фуқароларга базавий ҳисоблаш миқдорининг ўн бараваридан ўн беш бараваригача, мансабдор шахсларга — йигирма беш бараваридан ўттиз бараваригача миқдорда жарима солишга сабаб бўлади.
- худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, фуқароларга базавий ҳисоблаш миқдорининг ўн беш бараваридан йигирма бараваригача, мансабдор шахсларга эса ўттиз бараваридан ўттиз беш бараваригача миқдорда жарима солишга сабаб бўлади».
«260-модда. Ўзбекистон Республикаси Саноат хавфсизлиги давлат қўмитасининг органлари
- Ўзбекистон Республикаси Саноат хавфсизлиги давлат қўмитасининг органларига ушбу Кодекснинг 55, 55-1-моддаларида, 70-моддасида (ер қаъридан фойдаланишда ишларни олиб бориш хавфсизлиги қисмида), 97, 97-1, 98-моддаларида назарда тутилган маъмурий ҳуқуқбузарликлар тўғрисидаги ишлар тааллуқлидир.
- Ўзбекистон Республикаси Саноат хавфсизлиги давлат қўмитаси органлари номидан маъмурий ҳуқуқбузарликлар тўғрисидаги ишларни кўриб чиқишга ва жарима солиш тариқасидаги маъмурий жазо чорасини қўллашга қуйидагилар ҳақли:
- давлат қўмитаси раиси ва унинг ўринбосарлари — базавий ҳисоблаш миқдорининг ўттиз беш бараваригача миқдорда;
- департамент бошлиғининг ўринбосарлари — базавий ҳисоблаш миқдорининг ўттиз бараваригача миқдорда;
- департамент бошқармалари ва бўлимлари бошлиқлари — базавий ҳисоблаш миқдорининг йигирма беш бараваригача миқдорда;
- инспекцияларнинг бошлиқлари ва уларнинг ўринбосарлари — базавий ҳисоблаш миқдорининг ўн бараваригача миқдорда;
- кон-техник инспекцияларининг ва ҳудудий бошқармаларнинг бошлиқлари ҳамда уларнинг ўринбосарлари — базавий ҳисоблаш миқдорининг етти бараваригача миқдорда;
- давлат инспекторлари — базавий ҳисоблаш миқдорининг уч бараваригача миқдорда».
Изоҳ (0)