2019 йилнинг декабрь ойи охирида Қаршидаги боғчада хотинини рашк қилган эр у ерда ишловчи эркакни чавақлаб ташлагани ҳақида хабар берилган эди. Мактабгача таълим вазирлиги воқеа юзасидан расмий ахборот берди.
Маълум қилинишича, жиноят 2019 йилнинг 18 декабрида ташкилотда кир ювувчи ходим аёлнинг турмуш ўртоғи томонидан содир этилган. Воқеада болалар жабрланмаган.
Воқеа содир бўлган «Юлдузча» МТТ идоравий ташкилот ҳисобланиб, Қашқадарё вилояти Ички ишлар бошқармаси юрисдиксияси доирасида жойлашган. Тарбияланувчиларни қабул қилиш, шунингдек ходимларни ишга қабул қилиш ва ишдан бўшатиш Ички ишлар бошқармасининг туман бўлими томонидан амалга оширилади. Мактабгача таълим вазирлиги томонидан ушбу МТТга ИИБ рухсати билан методик ёрдам кўрсатилади.
Қайд этилишича, Мактабгача таълим вазирлиги томонидан боғчада хавфсизликни ошириш юзасидан ишлар амалга оширилмоқда. Шунга кўра, Мактабгача таълим вазирининг 2019 йил 14 октябрдаги буйруғига мувофиқ қўриқчилар учун қўшимча иш ставкалар жорий этилганлиги муносабати билан МТТ лари энди дам олиш ва байрам кунларида ҳам қўриқланади.
Бундан ташқари, МТВнинг ишчи гуруҳи томонидан мактабгача таълим ташкилоти ҳудудига бегона шахсларнинг киришини тартибга солувчи ҳужжат ишлаб чиқилмоқда. Қарши шаҳрида содир этилган ҳолатдан келиб чиққан ҳолда, тарбияланувчилар хавфсизлиги мақсадида қўшимча чекловлар жорий этилиши лозим. Бу руҳий жиҳатдан носоғлом, жиноят содир этишга мойиллиги бор, юқумли ва бошқа касалликлар билан касалланган шахсларнинг болалар олдида бўлиши хавфини камайтиради.
«Ҳужжатнинг лойиҳа вариантида ташриф буюрувчилар МТТга ташриф буюриш сабаби мавжуд бўлган ҳолда мудир ҳамроҳлигида ташкилотга кира олиши назарда тутилмоқда. Мактабгача таълим ташкилотида фаолият олиб борувчи эр-хотин ёки қариндошлар ёнига ташриф буюриш сабаб ҳисобланмайди. Мактабгача таълим вазирлиги жиноят қурбонининг оиласига ҳамдардлик билдиради», — дейилади вазирлик хабарида.
Айни пайтда Жиноят кодексининг 97-моддасига (жавобгарликни оғирлаштирадиган ҳолатларда қасддан одам ўлдириш) мувофиқ жиноят иши қўзғатилган. Ушбу жиноятни содир этганлик учун 15 йилдан 25 йигирма йилгача озодликдан маҳрум қилиш жазоси белгилган.
Изоҳ (0)