«Буни алоҳида тушунтиришга асос йўқ». Мирзо-Улуғбек Абдусаломов янги сайлов натижалари эскиси билан деярли бир хил бўлиб қолгани юзасидан гапирди
Қонунларни ишлаб чиқиш техникасидан яхши бохабар кишилар Олий Мажлисда қанчалик кўп бўлса, янги келган депутатларнинг фаоллиги шунчалик ошади. Марказий сайлов комиссияси раиси Мирзо-Улуғбек Абдусаломов 2019 йилги парламент сайловининг якуний натижалари беш йил аввалги жараённики билан деярли бир хил бўлиб қолгани юзасидан берилган саволга шундай жавоб берди.
2019 йилги парламент сайловларнинг умумий якунларига кўра, Олий Мажлис Қонунчилик палатасида ЎзЛиДеП 53 нафар (35 фоиз), «Миллий тикланиш» 36 нафар (24 фоиз), «Адолат» СДП 24 нафар (16 фоиз), ЎзХДП 22 нафар (15 фоиз) ва Экопартия 15 нафар (10 фоиз) депутатлик ўрнига эга бўлди. Таққослаш учун, 2014 йилги парламент сайловларидан сўнг ЎзЛиДеП 52 та ва «Миллий тикланиш» 36 та ўрин олган, ҳозирги Экопартиянинг «аждоди» Экоҳаракат учун 15 та ўрин кафолатланган эди. Аввалги сайловдан асосий фарқ — ЎзХДП ва «Адолат» ўрин алмашган, холос.
Мавзуга доир: Янги Ўзбекистоннинг янги парламент сайловлари якуний натижаси деярли эски Ўзбекистонникидек бўлди
Ҳар хил рақам бўлиши мумкин эди, аммо шу рақамлар тўғри келди. Менимча, буни алоҳида тушунтириш учун ҳеч қандай асос йўқ — шу рақамлар тўғри келди. Бошқа ҳеч қанақа гап йўқ.Депутатларимизнинг бир қисми депутатлик тажрибасига эга. Қонунлар ишлаб чиқиш техникасини яхши биладиганлар парламентда қанча кўп бўлса, янги келган депутатларнинг фаоллиги шунча ошади.
Мирзо-Улуғбек Абдусаломов, Марказий сайлов комиссияси раиси
